Innuttaasut, utoqqalinersiaqalernissaminnut killittut, sulili ukiualunni inuiaqatigiinni suliassanik kivitseqataanissamut piareersimasutut misigisut, immikkut utoqqalinersianut tapiummik aaqqiissuteqarfigineqassapput, tassani utoqqalinersiaqalernissartik aaliangiuppassuk. Assersuutigalugu tunngaviusumik naleq (ukiumut 78.000 kr. miss.) sipaarneqarsinnaagaluarpoq, tassani qaammammut (6.500 kr. miss.), qaammatit tamaasa utoqqalinersiaqalereersinnaasimagaluarluni sulisimanermi katersarineqarsinnaammat, utoqqalinersiaqalernissamullu aaliangiussigaanni, qaammatit tamaasa tassani suliffiusimasumi katersarineqarsimasut naleq ataasiartumik tunniuttakkatut tunniunneqarluni, tassani utoqqalinersiat pisinnaatitaaffigineqartut arlaatigut sunnerneqaratik.
Utoqqalinersiallit, utoqqalinersiaqaatigalutik suli sulerusuttut, aamma utoqqalinersiamminnik, ineqarnermut tapiutinut il. il. naatsorsuutsittassanngillat. Aalisakkanik tunisaqalaarusukkaanni, suliffeqarfimmi allamiluunniit sulilaarusukkaanni, tamanna utoqqalinersiaqartumut pillaatigineqartussaanngilaq. Utoqqalinersiallit, utoqqalinersiamik saniatigut isertitaqartut, utoqqalinersiaminnit akileraartareerput aammalu isertitatik allat B-skat-imut akiliutigisarpaat.
Utoqqalinersiallit, timimikkut imaluunniit tarnimikkut unammilleqqasut, ikiorneqarnissaminnut pisariaqartitartik pisussaavaat. Utoqqalinersiallit atugarissaarnerat isumaqatigiissutiginiarneqarsinnaanngilaq. Tamanut inuuneq nuannersoq toqqissisimanartorlu kissaatigaara.
Utoqqartatsinnik isumaginninnerput pitsaassutsimigut qaffasinnerusumik qulakkeertariaqarparput, nammineq najugaqaraluarpata, utoqqarnut tulluarsakkani najugaqaraluarpata imaluunniit utoqqaat illuanniikkaluarpata. Utoqqartatta atugarissaarnerat qulakkeertariaqarparput, ulluinnaanni toqqissisimaneq tamanit takuneqarsinnaalersillugu. Ulloq toqqissisimanartoq utoqqartatsinnut atugarissaartitsisussaavoq.
Nikolaj Rosing
