Atassummiit Palle Christiansenip tapiissutip ukiuni 20-25-ni marloriaatinngortinnissaa, kingornalu millisarnissaanik siunnersuutaa taperserparput. Danmarki piumassuseqarpat taamaaliortariaqarpugut – inuiaqatigiimmi atugaat oqarluartaarnermiit salliunnerusariaqarpagut.
Nunatta siunissaa tassaaleqqavoq sipaarnissaarsuaq. Uagullu politikkerit ullut tamaasa toqqagassarilissavarput akileraarummik qaffaaneq immaqaluunniit kiffartuussinikkut ajorseriartitsineq. Siornatigut nunatsinni aningaasaqarnikkut kipiluttunartumik inissittareersimagaluarpoq, tamatigullu politikkeriusut akisussaassuseqanngitsumik mattusersuipallaannartarsimapput. Aaqqitassavik alaannarlugu.
Ajornartorsiutillu massakkut imak annertutigilersimapput aaqqeeriarnissaq ajornartorujussuanngorluni. Allarluinnarmik iliuuseqartariaqarpugut. Aningaasaqarnermut Naalakkersuisuusimasoq Palle Christiansen KNR-mut oqaatigivaa siunnersuutigalugu naalagaaffimmiit tapiissut ukiuni 20-25-ni tulliuttuni marloriaatinngortinneqartariaqartoq, kingornalu millisarneqarluni.
Takorluulereersinnaavara naalagaaffinngorniapallakkusuttut uunga siunnersuummut qanoq qisuariassanersut. Ilunngarlutik akerliussapput oqarlutik nunatta naalagaaffinngornissaanut kinguarsaataaginnassasoq.
Marlunnillu oqaasissaqarpunga: Siullertut uagut qinikkat innuttaasut atugaat salliuttariaqalerpagut, inuk qitiutillugu, oqarluartaarnerillu tunuartikkallarlugit. Aappaattullu: Aatsaat taamak naalagaaffinngornissamut ungasitsigigunarpugut massakkut. Naluarpulluunniimmi aningaasartuuterujussuassanngortussat qanoq akilissanerlutigit, innuttaasunullu sullissineq naammaginanngilluinnartoq, ila qanoq nammineq kivitsiniassanerluta nalunarpoq.
Ullumikkut inoqatigut nakorsiaraluarlutik peqqinnissaqarfitsinniit ikiorneqarnissaat artorsaatigineqarmat ajoraluartumik toqukkut qimaguttut amerlavallaarujussuarput. Inuusuttunnguit piitsunngorumaartussat amerlavallaarput, ilinniartitaanikkut katataaqqangaaratta.
Danmarkip tapiissut qaffaaqataaffigerusussappagu, akuersaartariaqarpugut. Utaqqiisaasumik marloriaatinngortitsinikkut toqqaannartumik sunniuteqartussanut aningaasat atorsinnaalissavagut: Peqqinnissaqarfimmut, attaveqaateqarnikkut, sanaartorfigiuminarsaanermut, tarnikkut peqqissutsimut, inissiat aserfallassimaqisunut, nunaqarfinni talittarfeqarnermut – minnerunngitsumillu akileraarutimut apparsaassinikkut, generation nutaaq sulerusussusilik piumassusilillu pilersikkumallugu.
Aningaasaliinerussaaq siunissami naalagaaffinngornissamut qanillattortitsisussaq – piviusorsiortumik. Uannulli pingaarnerpaavoq innuttaasut toqqissisimanissaat, artorsaratillu inuunissaat naqissusissallugu. Tassa salliutassagut.
Aqqalu C. Jerimiassen
Siulittaasoq, Atassut
