Aatsaat taamak toqqissisimanissaq pisariaqartigilerpoq. Nunarsuarmi pissaanilissuit akornanni Nunatta ukkatarineqarnerani, nukigut tamaasa atortariaqarpagut inoqatigut meeqqagullu toqqissisimallutik inuuniassammata.
Toqqissisimassagutta inoqatigut, ikinngutigut, ilaquttagut meeqqagullu salliuttariaqarpagut. Kiisalu toqqissisimassagutta piviusorsiortumik mianersorlutalu nunanut allanut attaveqaatit ingerlanneqassapput.
Namminersornermut inatsiserput nutartertariaqarpoq. Nassuerutigisariaqarparput tuaviuussamik peqqissaarnagulu suliaasimasoq. Uagutsinnut ineriartuutasumik ilusilersortariaqarparput, killilersuutaanani iluaqutissartaqartariaqarpoq. Pingaartumillu aatsitassarsiornermut tunngasortaa, sinneqartoorutit tamakkiisumik Nunatta karsianut tuttussanngortillugit.
Partiilersorneq annertuallaarpoq. Inuup nammineq isumaa partiiniit naleqarnerusariaqarpoq. Partiit aporfilersuutaavallaassanngippata toqqaannarnerusumik tamat oqartussaaqataanerat atuuttariaqarpoq. Nunatsinni innuttaasut amerlannginnatta innuttaasunik taasititsinissaq pisariunngilaq. Politikkerit isumalluutigivallaarpagut, utaqqiinnartunngussanngikkuttalu partiit avaqqullugit innuttaasut isummersortissinnaasariaqarpagut. Assersuutigalugu Kuannersuarni uranitalimmik qalluisoqarnissaa pillugu isummerfissaq tunngaviulluinnartumik inissisimammat innuttaasut taasitinneqartariaqarput.
Ilanngullugulu Nunatta naalagaaffinngornissaminut piareersimanersoq Inatsisartunut qinersinerit tamaasa ilanngullugu apeqqutigineqartariaqarpoq. Eqqoriaaginnartoqarsinnaanngilarmi, innuttaasut akuutittariaqarpavut, partiiniimmi innuttaasut isumaat pingaarneruvoq. Pissaaneq inunnut utertitsigu. Qulaaniit politikkeriniit aqutsinerujussuaq naaggarparput. Pissaaneq inunniittuaannartariaqarpoq, partiiniunngitsoq, politikkeriuniinngitsoq.
Tamallu oqartussaaqataanerat suli siuarsassagutsigu innuttaasut siunnersuuteqarsinnaasariaqarput.
Demokratiskiusumik politikkikkut ingerlatsinerput nukittorsartariaqarparput. Innuttaasut tusaaneqarusullutik oqariartorput. Taamaammat Atassummiit anguniarparput nuna tamakkerlugu siunnersuutinut namminersorlutik oqartussaniit allattorsimaffimmik pilersitsisoqassasoq qinikkat siunnersuusiornissaminnut aallerfigisinnaasaat.
Naalagaaffiit pissaanilissuit tiguassanngilaatigut. Amerikkarmiut nammineerlutik oqaatigaat nunarput naalagaaffinngorpat tiguarniaraatigut. Tamanna ernumanartutut Atassummiit isigaarput. Naluarpummi tiguaaniarnerat iluseqassanersoq. Taamaammat isumalluutigisinnaanngilarput paasisaqarluartinnata. Ernumanartuali tassaavoq amerikkarmiut nunap inoqqaavinik inussiaateqarnikkullu ajorluinnartumik iliuuseqartarsimasut, ilami aamma naggueqatitta Alaskami oqariatuutigaat USA-mut ilanngutinngilluinnassasugut kinaassuserput pisinnaatitaaffigullu iluatigigutsigit.
Taamaammat Atassummiit naalagaaffeqatigiinneq suli attakkusupparput, pissaanilissuarniit illersorfissarigatsigu.
Aalisarneq tassaavoq imminut pilersorneq. Aalisarneq kiffaanngissuseqarfiussaaq.
Aalisarneq Nunatsinni aningaasarsiutit pingaarnersaat tassaassooq Aalisarnermut attuumassuteqartut tamarmiusut ineriartorfingisinnaallungulu toqqissisimasumik peqataaffigisinnaasaat
Aalisartup inuussutissarsiorfingisani nammineerluni kiffaanngissuseqarluni ilusilersorsinnaasariaqarpaa
Aalisarnermik inuussutissarsiuteqartut tamarmiusut aalisarnerup aaqqissuussaanerani assiggiimmik atungassaqartinneqassapput/
periarfissaqartinneqassapput
Pisortat pingisaat aalisarnermik ingerlatsinermi namminersortuniit piginnaatitaaffeqarnerussanngillat
Avataasiorluni aalisarneq sinerissallu qanittuani aalisarneq peqassutsip piujuaannarnissaanut ulorianartorsiortitsissanngilaq tamannalu Inuiaqatigiittut tamattaalluta akisussaaqataaffingaarput
Aalisarnermi ilisimatuussutsikkut ilisimasat katersorneqartarnerinut uumassusilerituut aalisartullu qanimut suleqatigiissapput tassanilu aalisartut kattuffii avaqqunneqarnatik suleqatigineqassapput
Aalisarneq piujuartinniarlugu aalisarnerup ineriartorfiujuaannarsinnaanera piujuartariaqarpoq kiffaanngissuseqarfiusoq tassanilu tunitsiviit avaqqunneqarsinnaanngillat taamaattumik tunitsiviit Nunamiittussaatitaanerat atorunnaartariaqarpoq
Allat oqartarput ”Nuna” sullikkumallugu, Atassummiit INUK sullinniarparput. Allat oqartarput ”Nuna” nammineertoq anguniarlugu, Atassummiit INUK nammineertoq toqqissisimasorlu anguniarlugu sulissaagut.
Tassaavorlu Inuk Qitiutillugu!
Qinersiartorussi eqqaamassavarsi: Qinikkappit illit akileraarutikkut illit aningaasaatitit akisussaaqataaffigilertussaavai. Qineqqusaarutit tamarmik akeqarput. Illit akiligassatit.
Akileraartarnikkut aaqqissuusseqqinneq sulissutigaarput, illerpiaq nammineq aningaasaatitit akisussaaffiginiassagakkit. Akileraarut apparniarparput annertuumik. Illit sulinikkut akissarsiatit inuiaqatigiit piginngilaat. Illinuku akissarsiatit. Akisussaaffik inunnut utertinniarparput. Akileraarut tamanut “flat tax” assigiimmik appasissumik inississavarput, allaat ilanngaatit pisariaqarunnaarsillugit, aamma illusiniartunut ilanngaat isumalluutaajunnaarsillugu akileraarutip apparluarneratigut.
Sulilluartut pillartussaanngilagut. Sulilluartoq akiligassanittoq – sulinngitsoq utertoortoq. Ila ajortoqarpoq.
Nunatsinni sulineq imminut akilersinnaanerulertariaqarpoq.
Akiligassinneqarneq utertoornerlu atorunnaartariaqarput. Allaffik qitiutinnagu – inuk qitiutillugu.
Suliumanngitsoq tunioraannarsinnaanngilarput sulilluartup akiligaanik.
Piffissanngorpoq kommunerujussuit atorunnaarsinnissaannut alloriaateqaqqissalluta. Kommunerujussuit nalilersorneqarnissaat, qanorlu pitsaanerusumik agguataarneqarsinnaaneri pillugit misissuititsineq siunnersuutiginikuusimasarput piareeriarpat innuttaasullu tusarniarneqarluareerpata, kommunimut qinersinissap tullissaanut ikaarsaariarnermut ataatsimiititaliamut ilaasortassanik taasisoqarnissaa anguniarparput.
Sineriak tamakkerlugu inoqarfiit tamavimmik naammaginartumik angallannikkut tikinneqarnerusalernissaat Atassummiit anguniarparput, kiffartuussinikkullu isumaqatigiissutikkut tamanna aaqqivigineqarnissaa siunnerfigaarput. Kiisalu namminersortuuneq oqilisaaffigineqariarpat aamma angallannikkut suliffeqarfiit amerliartortinneqarsinnaalissallutik. Inoqarfinnilu talittarfeqarnikkut tulluarsaasoqarnissaa Atassummiit eqqanaarinniffigerusupparput. Tamannalu uani qinigaaffimmi iluatsittumik siunnersuuteqarnikkut angusaqarfigisimavarput. Suliarli naammassinngilaq suli talittarfeqarnikkut sumiiffinni mikinerusuni siuarsaanissaq pisariaqarpoq, tamannalu sukataarutigeqqissavarput.
Qitiusumik allaffissaarsuarput alliartortuarpoq. Pilersitaavoq qitiusumiit akisussaaffippassuarnik tigusinikuusimanermiit. Kingunerivaalu inuit ungasianiit sullinneqartuartarnerinik. Suliffissuarnik, atuarfinnillu nuussuiniarneq pinnagu, qitiusumiit kommuninut akisussaaffinnik nuussinissaq Atassummiit anguniarparput. Inuit qanimut sullinneqarnerulissapput, kommunillu aningaasaqarnerinut pitsanngorsaataalluni.
Aningaasaqarnerup pisortaniit akuliuffigineqarnera minnerpaaffianiissaaq. Inuit suliffeqarfiillu nammineersinnaassuseqarnerat killilersorneqaratillu kiffaanngissuseqarnerat annerpaaffianiitinneqassaaq. Atassummiit inuit suliffeqarfiillu tatigaagut. Inuttullu qulaaniit aqunneqarneq naaggaarparput. Ullutsinnili liberaliuneq libertarianiunermut paarlaanneqartalersimavoq. Libertarianisme tassaammat ”Uanga ajunngikkuma naammaqaaq”, taanna Atassummiit atorusunngilluinnarparput.
Nunatsinni inuup peqqissusaa, toqqissisimanissaa, atugarissaarnissaa, nammineersinnaassusaalu qitiulluinnartariaqarput. Namminiilivinnissamut takorluugaq kusanartuuvoq. Inuulli nammineersinnaasup imminullu pilersorsinnaasup nuna namminersortoq pilersissavaa, killormuunngitsoq. Naalagaaffeqatigiinnermi atugarissaarnissaq ineriartornissarlu qulakkiissavarput, naalagaaffissuarnullu iluanaarniartunut illersorluta.
Akileraartarnikkut inuit artukkerumanagit
- Inuit atugaat ajorseriartikkumanagit
- Peqqissutsikkut inuit innarlerumanagit
- Naalagaaffissuarnit allanit nunarput illersorumallugu
- Nunatta karsiata ajalusuunnginnissaa pillugu
- Nunat pingasut suleqatigiinnerat nukittoqutigiumallugu
- Namminiilivinnissaq naalagaaffinngornissarlu massakkut akissaqartinnginnatsigu
- Inuit atugaasa qaffassarnissaat namminiilivinnermiit pingaartinnerugatsigu
- Ilinniartitaanikkut periarfissat attakkumallugit
- Oqaatsigut illersorumallugit
- Kinaassuserput annaanaviannginnatsigu Naalagaaffeqatigiinniitsilluta
- Nunarput suli nunasiaataasutut oqartoqartaraluartoq, Danmarkimiillu nunarput kalaallillu naqisimaneqartutut misigisoqartaraluartoq, Atassummiit nammineq aqutsisutsinniit, nammineq qinikkatsinniit naqisimanninneq, qulaaniit aqutsinerujussuaq, kiffaanngissusiiagaaneq, demokratiimik innarliiuarneq ulluinnarni misigiuartakkagut unitsikkumallugit nukigut atussavagut.
Atassut aatsitassarisornissamut tapersersuisuuvoq. Annertunerpaamillu suliffissaqartitsinikkut, aningaasarsiorfissatullu, ilinniakkanullu ineriartortitsisussatut aatsitassarsiornissaq isumalluarfigivaa. Pingaarluinnarporlu inunnut, peqqissutsimut, pinngortitamut uumasunullu innarliinngilluinnarnissaa sapinngisamik qulakkeerniarneqarnissaa. Taamaattoqanngippat aatsitassarsiorneq aallartinneqassanngilaq sumiiffimmi.
Uranitalimmik aatsitassarsiornissamut tunngatillugu Atassut ersarissumik siunnerfeqarpoq.
Uranitalimmik allanillu qinngornernik ulorianartunik akulinnik aatsitassarsiortoqartassanersoq pillugu tunngaviulluinnaqqissaartumik nuna tamakkerlugu innuttaasut taasinikkut isummerfigisariaqarpaat.
Innuttaasullu uranitalimmik aatsitassarsiorsinnaanissamut akuersissagaluarpata, immikkut Kuannersuarnut tunngatillugu Narsarmiut eqqaaniittullu tassani oqartussaasariaqarput isummerlutillu, najugarimmassuk, inuuffigalugulu.
Atassummiit tunngaviulluinnartumik isummerfissaq partiilersuussutigissallugu tulluartinngilarput, partiillu namminneq soqutigisatik pillugit inunnik sunniiniarnerat pissusissamisoorsorinatigu. Uran pillugu isummerneq parteeqanngilaq, inuillu tamat oqartussaaqataanerat tunngavigalugu nukittorsarusullugulu Atassummiit taasisitsisoqarnissaa anguniarparput. Minnerunngitsumillu Atassummiit qulaaniit aqutsinerujussuaq akerlerigatsigu, inuit kikkulluunniit pinngitsaaliissutaasumik aalajangersaaffigissanngilagut.
Taasititsinissarlu pissaaq piaartumik qinigaaffimmi uani, susassaqartut pineqartullu tamarmik tusaaneqarnerisigut, saqqummeereersimanerisigullu. Taasititsinissaq pissaaq inuit paasissutissinneqarluarsimanertik naapertorlugu, pitsaaqutaasut, ajoqutaasullu ilisimalluarlugit.
Peqqissutsip tungaatigut ilinniarsimasunik sulisussarsiorneq qulakkeerniagassaraarput. Peqqissutsimut ilinniasimasut tamakkipajaarlugit amigaatigereerpagut. Ammaffigaarputtaaq danmarkimiit autorisationeqanngikkaluarluni nunatta peqqinnissaqarfiani atorfinitsitsisinnaanissaq.
Qulakkiigassarlu pingaarutilik tassaavoq peqqinnissaqarfimmi sulisut suliffimminni iluarisimaarnissaat, allaanerunerlu inissaqarfiulluni. Suliffik kajuminnartoq aqqutigalugu sulisunik ataavartumik paarinnissinnaaneq tikikkiartussavarput.
Sapinngisamillu AI atorluarfissamini atorluartariaqarparput sulisunut oqilisaataasinnaaffinni. Nassuerutigalugu imaaliallaannaq peqqinnissaqarfitsinni sulisussaaleqineq qaangerallarnavianngikkipput. Tassanilu Ai tulluarpoq allattorsimaffinnut tunngatillugu, nappaatillu suussusersinissaanut aamma periarfissatut oqilisaataasussatut tulluartipparput.
Siulliullugulu nappaassuarmik kræftimik eqqugaasut katsorsarneqarnissamut qulakkeerinnittussaatitaasariaqarput, nalunngilarpummi nappaassuaq taanna sukkasuumik siaruaatipallattartoq. Nappaateqarnermut paasisaqarnermiit sivisunerpaamik ullut 30-it utaqqisoqartarnissaa anguniarparput.
Annerusumillu tarnikkut nappaateqalersimasut salliunnerulertariaqarpagut, taamaaliussagut peqqinnissaqarfiup kommunillu annerusumik suleqatigiilersinnerisigut. Tarnimikkut nappaatillit ilaqutaasullu annerusumik eqqugaasarput sivisuallaamik ikiorserneqarnissamut utaqqisinneqaraangata. Alianaraluaqisumillu ilaatigut imminut toqunnermut annaasaqaataaffiusarluni.
Peqqinnissaqarfipput peqqissartariaqavissorparput, artukkersuinnarnatigu innuttaasunullu toqqissisimaffiusumik ingerlalersillugu. Nammineerlutalu inuttut aamma eqqaamasariaqarparput tamatta immikkut nammineq peqqissuserput annerpaamik akisussaaffigigatsigu, inooriaatsimullu tunngassuteqarluni. Taamaalilluta ikiortariaqavissut nukissaqarfiginerulissavagut.
Arlaannaataluunniit tiguagassarinngilaatigut avataaniit.
Taamaattumik inuusuttagut sinerissatsinni killeqarfitsinnik paarsisuulersinnaasut periarfissaqartilluartariaqarparput, uagut nunarput, uagut killeqarfipput, uagut nakkutigisasaarput.
Ileqartariaqarpugulli, ajunnginnerutitarpullu tassani toqqartariaqarput, nunarput Nato-mut ilaassaaq.
Nunarput nammineerluta oqartussaaffigissagutsigu meeqqagut ilinniarluarnissaannik kaammattortariaqarpagut. Meeqqap ilinniarnerani angajoqqaap kaammattuinera tapersersuinera piumasaqarsinnaaneralu pingaarnerpaarpaajuvoq. Atassummiillu isumaqarpugut Atuarfitsialak aaqqissuusseqqinnermi nutarterujussuartariaqartoq.
Meeraq inuunermut inersimasunngornissamullu piareersartoq tulluarsallaqqinnerusariaqarpoq, atuarfitsialaammi siunertarisimavaa meeraq aallaavigalugu ilinniartitsineq ingerlanneqartassasoq. Ajoraluartumilli piumasaqaatit taakku ilinniartitsisunut artukkeerujussuarput, meeqqallu killissaminnik ujartuinerat unitsikkuminaassilluni. Atuarfik meeqqanut annerusumik piumasaqarsinnaalertariaqarpoq.
Atassummiillu 11. Klassip periarfissaalernissaa kissaatigaarput.
Atorfiit qaffasinnerit kalaallisut oqaluttunik taarsersorniarutsigit kalaallit nammineerluta oqaatsinik nutaanik ilinniarnissaq suli pikkoriffiginerulertariaqarparput. Ilinniakkammi qaffasissut nunani allani ilinniarnikkut angusassaapput. Meerartagut tuluttut pikkorissiartuinnartut tamatta malugisinnaavarput. Ilinniartitaanikkullu tuluttut oqaatsit suli initunerulernissaat ammaffigaarput.
Meeqqat atuarfiat, ilinniakkallu ingerlariaqqiffiusut tulluarsarsinnaavagut. Pingaarnerpaavorli uagut nammineq ilinniarnerup tungaatigut immitsinnut piumaffiginerulernissaq.
Qulaaniit aqutsinerujussuaq unitsinneqartariaqarpoq, inuup kiffaanngissusaanik innarliivoq. Atassummiit inuit tatigivagut. Ikiorusuppagullu atugaat sumiiffiallu naapertorlugit akiitsuminnik akilersuilersissallugit. Akiliisitsiniartarnermut oqartussaaffik kommuniniit tamakkiisumik inuit qanimut sumiiffimminni sullinneqalerpata. Atassummiit akileraartarnermut inatsisip allanngortinnissaa suliarissavarput kommuniniit akiliisitsiniartarnermut oqartussaaffik isumagisinnaalersillugu, kommunillu aningaasaqarnerinut qaffassaaqataasinnaalersillugu, ineriartortitsinikkullu atorsinnaalersillugit.
Inuttut kiffaanngissuserput innarlerneqarpoq pinngitsaaliissummik utoqqalinersianik katersisussaatitaaleratta. Atassummiit inuit nammineersinnaassusaat tatigaarput, atukkatillu naapertorlugit nammineerlutik aalajangersinnaasariaqarpaat qaqugu katersillutik aallartissanerlutik, qanorlu annertutigisumik ileqqaarisarusunnerlutik. Inuup kiffaanngissusaa innarlinngisaannartigu. Ilinniakkaminnik naammasserlaat illusinissaminnut katersinissaraluat innarlerneqarpoq, sulilerunik ingerlaannaq pinngitsaaliissummik akiliisussanngortinaanerat pillugu. Tassa nammineerusunnermut killilersuineq.
Motoorilinnut akitsuusersuisarneq inunnut sumiiffinnullu tamanut qaninnerusumik isumagineqartalernissaa Atassummiit siunnerfigaarput. Qitiusumiit oqartussaafferujussuatta millisarniarnissaani Kommuninut siaruaassuinissarput pisariaqarluinnarpoq, sumiiffinni ineriartorneq pissappat. Kommuninilu aningaasaqarnermuttaaq iluaqutaassalluni.
Nunatta imartaani, sineriatsinnilu kangerlunni aalisakkat suli atorluanngisagut amerlapput. Taamaattumillu periarfissat ujartuiffigineqarnissaat Atassummiit suliariniarparput, angallatinut tunngassuteqarpat, pisasseeriaanermut tunngassuteqarpat, tapeeriaatsimullu tunngassuteqarneri misissorluarlugit.
Nunatta pissarititaanik, nammineq pigisatsinnik nioqqutsissiornissamut siuarsaaqqissagutta, inuussutissalerinermut oqartussaaffik nunatta aquttariaqarpaa. Taamaliornikkut nunatsinni nioqqutissiornissamut tulluarsakkamik inatsisiliorsinnaalissaagut, sukkanerusumik oqinnerusumillu aallartisarusuttunut periarfissaqalerluni. Oqartussaaffillu taanna nunatsinniilerpat ilinniagaqarnermut malitsigisassai aamma Atassummiit ammaffigaagut siuarsaaqataaffigissallugit. Siunnersuuterput Inatsisartuni akuerineqareersimagaluarpoq, Naalakkersuisulli suliaq uninngatiinnarsimavaat. Aalluteqqissavarput.
Utoqqaat suliunnaarnerminni toqqissillutik eqqissillutillu inuusinnaasariaqarput, naleqartinneqartutullu misigalutik. Taanna kialluunniit assortornavianngilaa. Atassummiilli pingaartipparput utoqqaat suli annikitsumik tamakkiisumilluunniit sulerusuttut piumassuseerutsinnginnissaat. Tamakkiisumik sulisinnaallik, tamakkiisumillu allatuulli akileraartinneqarlik. Utoqqalinersiaanniilli arsaartorneqartarnerat Atassummiit unitsissavarput. Nunatta karsia annaasaqarnavianngilaq, iluanaaginnassaaq. Utoqqaat suli sulerusuttut inuiaqatigiinni suli atorfissaqartippagut, ilisimasaallu suli atorfissaqartippagut.
Minnerunngitsumillu atorfiit ilaanni 65-leereersimasut suli suliffimminni sulerusukkaluartut soraarsitaasarnerat unitsinniarlugu sulissuteqassaagut.
Oqartoqartarpoq Kalaaliugama namminersulivikkusuppunga. Oqartoqartarpoq kalaaliugama nunarput sullikkusuppara aamma Kalaaliugama kalaaleqatikka sullittuassavakka. Tamattami kiffaanngissuseqarpugut isummersussalluta. Atassummiit kinaassuseq ammip, nutsat, isillu qalipaataaniitsinngilarput. Aamma oqaatsit atukkagut aallaavigalugit avataaniit qulaaniillu nalilersorneqassanngilagut kinaanersugut. Kinaassuserput nammineq pigaarput. Assaallu nunatsinni suleqataasut iluaqutigalugit atorluartariaqarpagut, akileraaqataammata, suleqataammata, inuiaqatigiinnilu napatitseqataallutik. Atassummiit nunarput asavarput, innuttaasulli sullikkumallugit salliullugillu sukataartuassaagut. Inunnik immikkoortiterineq ilutsinni nukillaarsaataaginnarpoq, siuariarusunnitsinnullu nukillaarsaataalluni. Tamassi inissaqartillusi tusaarusullusilu Atassummiit sassarpugut.
Inuussutissarsiutit nutaanik oqalukkaangatta aalisarnerup iluani, aatsitassarsiornerup iluani, takornariaqarnerullu iluani takorluugaqakkajuttarpugut. Taakku suliat ingerlassapput. Atassummiilli Inuussutissarsiutissatut nutaatut taarusuppagut, eqqumiitsuliornikkut suliat assigiinngitsut, nipilersorneq, isiginnaartitsineq, atuakkiorneq, filmiliorneq il.il. taakkuuppummi pisortaniit taperneqarsimagaangamik, inuiaqatigiinni aningaasat kaaviiaartereersimatillugit pingasoriaatinngorsimallutik, tassa 1kr tapiissut, 3kr-ninngorsimalluni nunap karsianut utertussat. Inuussutissarsiortuni namminersortuni allani 1kr agguaqatigiisillugu 1,57kr-inngortarpoq. Eqqumiitsuliornerullu avataatigut timersorneq inuussutissarsiutaalluarsinnaasutut isumalluutigaarput, pikkorissorpassuartaqarattami. Tamattali timersortartuunngilagut, pikkorissorpassuaqarporli, unammiuaarutit nutaat atorlugit nunarsuatsinni unammillerluarsinnaasunik. Taakku eSportinik taaneqartarput, millionerparujussuarnillu aningaasanik kaaviiaartitsisarlutik nunaminni. eSport pisortatigoortumik sportitut unammiuaarutitut taaneqalerpat, aamma tapiisinnaanerit, unammiuaartarnerillu annertusaaqataaffigisinnaavagut. Ilanngullugulu qarasaasialerillaqqissortagut ilinniagaqarnerannut annertuumik tapersersorusuppagut, ukiuni makkunani, siunissamilu app-it, spil-it, programillu annertuupilussuarmik aningaasarsiutaalersimammata.
Atassummiit qulaaniit aqutsinerujussuaq killilerujussuassavarput. Oqartoqartarpoq Danmarkimiit nunarput aqunneqartoq. Atassummiit oqarusunneruvugut qitiusumiit, inatsisiliatsinniit, Naalakkersuisuniillu aqutsinerujussuaq annerpaajusoq, allaallu nammineq qinikkatsinniit killilersuinerujussuit, pinngitsaaliissutinik inatsisiliorneq aqqutigalugit aqunneqartugut. Ullumikkullu killiffigilersimavarput allaat Naalakkersuisut Inatsisartut avaqqullugit aalajangiisinnaalersimallutik, ataatsimiititaliat avaqqullugit aalajangiisinnaalersimaneri. Tamanna demokrateeqarnermut pissaanerullu pingasoqiusanngorlugu agguataarneqarneranut ulorianarluinnarpoq. Ilaatigullu nunanut kommunistiskiusunut aqutseriaaseq assinguleraluttuinnarluni. Inuttut kiffaanngissuserput uterteqqittariaqarparput.
Kaammattuiuarpugut inuussutissarsiuteqarnikkut namminersortunngorsaarusulluta. Atassummiit sulissutigissavarput Greenland Businessip Kommunini tamani immikkoortoqalernissaa, qanimullu inunnut namminersulerusuttunik annerusumik ikiuisinnaalernissaa siammasinnerulertikkusullugu. Namminersortunngorusuttup ilaatigut akileraartarnikkut, qanorlu allaffissornikkut aningaasat nalunaarsussanerlugit nalornissutigalugit aallartinneq ajulissutigisarpaat, ilaatigullu aallartikkaluarlutik taakku unittuussutigisinnaasarlugit.