Inatsisartunut qineqqusaarnermi kingullermi arlaleriarlunga suaarutigisarsimagaluarpara nunatsinni aningaasaqarnerput pitsanngorsartariaqaraluaripput, utaqqiinnarsinnaajunnaarpugut.
Kissaatigisamalu ilaat tassaavoq innuttaasunut isumassarsialinnut piumassusilinnullu aallarnisaanermut illunik pilersitsisoqarnissaa, taamaalillutillu suliffeqarfiliornissamut aallartinnissaminnut piareersarlugit. Minnerunngitsumillu avammut tunisassiorsinnaanerulernissaq eqqarsaatigalugu.
Nunatsinni ineriartortitsisariaqarpugut. Tamannalu aningaasarsiorfissanik assigiinngisitaartunik pilersissavarput. Aalisarneriinnarmi takornariaqartitsinerlu kisiisa isumalluutigisinnaanngilagut.
Naalagaaffinngornissamut aningaasat nukiillu atorunnaamisariaqarpagut. Tassunga tunngatillugu ataatsimiititaliat allallu naalakkersuisoqarfiit illikartittariaqarpagut, massakkullu inuit atugaannut tunngasut salliullugit, aningaasaqarnerlu pitsaanerusoq ujartortariaqarparput. Pingaartumillu siunissami avammut tunisassiornikkut periarfissat aningaasarsiorfiusinnaasut aningaasanik illikartitsisariaqarpugut. Tassa tamanut atugarissaarnissamik qulakkeerinninniarnermi aqqutissarput.
Inuussutissarsiuteqarnikkut siuarsaaneq aallartinngikkutsigu nikerianngitsuuginnarata atugarissaarneq innarlerujussuassavarput ajalusoortillugu. Inuusuttortatsinnut ilinniartitaaneq, peqqinnissaqarfik, soraarnerussutisiaqarnikkut il.il. taakkuuleratarsinnaapput unganartutut atorunnaarsimasutullu kingumut eqqaaneqartalersinnaasut, toqqissisimaffigisarnikuusaraluagut.
Atassummiit nunatta siunissaa toqqissisimanartoq, innuttaasullu toqqissisimanerat salliupparput. Atassummiit inuiaqatigiinni atugarissaarneq pitsaasoq anguniarparput, tamannalu uteqattaassavarput sulissutigalugulu.
Nikolaj Rosing
Aaqqissuussaanikkut siulittaasup tullia, Atassut
