-Ilimagiivippara ukiualuinnaat ingerlassasut. Sukkanerpaamik ineriartorpugut. Ilimagaara, qanittukkut takkutilersoq.Taamak Trumpip Kalaallit Nunaannut aallartitaa, Tom Dans, DR-imut oqarpoq, tassa qaqugu Trump Kalaallit Nunaannut isumaqatigiissuteqassanersoq pillugu. Trumpillu eqqarsartariaasiani suleqatigiinneq tiguaanermik isumaqarluni.
Politikkikkut oqallinnermi soorlu trumpip Kalaallit Nunaannut tiguaanissaminut siorasaarutigigaa, pisariaqassappallu pissaaneq atorumaartoq puigorneqarsimagunarpoq, USA-li maannakkut Ukrainep aatsitassaataanik tiguaaniarsarimmat, isumaqanngilaq tamanna uatsinnut takkukkumaartoq.
Tamanna isumaqarpoq, piffissaq namminiilivinnissamut misileraaffiunissamut imaluunniit avissaartuutsitsinissamut naleqqutinngitsoq.
Oqaatigisagut tamarmik Washingtonimiit tusaaneqartarput, nunatsinnillu tiguaanissamut amerikkarmiut ingattarserlutik piviusorsiunngitsumik iluminni saqqummiussisarlutik.
IA-p Siumut-lu silatoortaasa, Aqqaluk Lyngep aamma Jes G. Berthelsenip, pisup ilungersunartuunera ilisimavaat ersarissarlugulu piffissaq namminiilivinnissamut sinnattut iliuuseqarfiginissaannut piffissaanngitsoq. Partiilli aqutsisut marluk nunatsinni qineqqusaarneq nunatta siunissaaniit pingaartinnerugaat.
Trump Kalaallit Nunaat pigerusullugu aalingernikuuvoq, USA-milu kialluunniit allatut isumaqalersikkunnanngilaa. USA-mut ilaalissagutta, qularnanngilaq nunatsinni siunissarput nammineq naalagaaffigisinnaanngornissaa angunavianngikkipput.
Siunissami namminersulivissagutta ataqatigiinneq periarfissatuaraarput, Kalaallit Nunaannilu ataqatigiinneq naammanngilaq aamma naammannavianngilaq. Danmarkilu ataqatigiinnissaq pisariaqarpoq, aamma EU tamakkerlugu, kiisalu nunat allat nunarsuarmi inatsisitigut maleruagassanut tapersersuisut tamakkerlugit. Ataqatigiinnermut oqaatigineqartartut ajoqutaanerpaat ukuupput, Danmarkilu naalagaaffeqatigiinnermi pisut nuanninngitsut kisiisa eqqartorneqaleraangata.
Atassummi isumaqarpugut, naalagaaffeqatigiinneq amerikkarmiut tiguaaniarnerannut illersornissatsinnut sakkussatut pitsaanerpaasoq. Aammattaaq isumaqarpugut, maannakkut ataatsimoorluta naalagaaffeqatigiinneq nalilersoqqittariaqaripput, taamaasilluni siunissaq ungasissoq eqqarsaatigalugu tamanut nuannaarutaasumik iluaqutaajumaartoq.
Utaqqiisaasumik tamanna aaqqiinerussaaq, taamaasilluta toqqaannartumik toqqaannanngitsumilluunniit killormuanik oqariartuuteqartarunnaassaluta.
