Paaqqinnittarfimmiititaqarneq akeqarunnaarli

Sooq ilaqutariit meeqqaminnik paaqqinnittarfimmiitsitsinissamut akiliisariaqavissorpat? Tamanna Atassut Nuummiik annertuumik apeqquserparput.
Meeqqat atuarfianni atuarneq aammalu ilinniaqqissinnaaneq akeqartinneqanngilaq. Ilinniartoq 18-nileereersimaguni ilinniarnersiuteqartinneqassaaq imaluunniit ilinniartutut akissarsiaqartinneqarluni.
Meerartatsinnut inuusuttortatsinnullu neqerootutigineqartut qulaani taakkartukkat assigalugit 0-miik 6-mut ukiullit akeqanngitsumik paaqqutarineqarsinnaatitaanissaat qanoq akeqassagaluarpa.
Tassami ilaqutariinnut akiligassiissutiliornissamut allaffissornerujussuaq akikitsuinnaasimanavianngilaq aamma. Isumaqarpugut aaqqiissuussinikkut aningaasatigut kingunerisassat allaffissornerujussuartaata peerneqarneratigut aamma matussuserneqaannarsinnaaneratulli issasut. Tamassuma misissorneqarnissaa Atassut Nuummiit sulissutigissavarput Kommuneqarfik Sermersuumilu meeqqat akeqanngitsumik paaqqinnittarfinniissinnaanissaannut periarfissanik ujartuilluta.
 
Pitsaanerusumik iliuuseqarta – Atassut Nuuk