Nammineq nunamini tikilluaqqusaannginneq

Inuiattut immitsinnut sukasaruttulernitsinni, immitsinnullu piorsarnialeruttorfitsinni. Inuiattut naleqassuserput qaffassarniarlugu nunaqqatigut allatut isikkullit, akusaasimasut, kalaallisullu oqalunngitsut naleqannginnerusutut tikilluaqqusaanngitsutullu misigitilersimavagut.

Nammineerluta angusaqarusukkutta inuk alla naqisimaqqaartariaqarparput? Pissarsiaqarusukkutta allamiit arsaarinneqqaartariaqarpugut? Immitsinnut qaffasinnerusumik isigissagutta allat appasinnerusumik isigeqqaartariaqarpagut? Naamerluinnaq.

Nunaqqaterpassuagut ilinniarluarsimasut, inuiaqatigiinni suleqataallutillu kivitseqataasut, allaallu inuunertik tamaat nunatsinni najugaqarsimasut, inooriaatsitsinnullu oqaluttuarisaanitsinnillu ilisimasaqarluartut ajattorlugit aallartissimavugut, namminneq nunaminni tikilluaqqusaanngitsutut misigilersillugit.

Inoqatitsinnut inussiarnernerusariaqarpugut, inuiaqatigiit imminnut kimmaattut siuariarnissaminnut imminnut naallerarput. Inuiaqatigiilli kaammattuisut sunarsuaq angusinnaavaat. Kinaassuseq imminermiippoq qulaaniit aqunneqartussaanngitsoq, pikkorissuseq inunnullu pissusilersuutigisarput uuttuutigisigu atorluarlugulu.

Angusaqarusukkutta sukataartariaqarpugut, pikkorinnerulerluta, terlinganiit nilliaannarata. Oqassagutta ”sapinngilagut”, sapernata takutittariaqarparput suaarutigiinnarnagu.

Tamatta tamavitta inuttut naleqarpugut atorfissaqarlutalu.

Atassut

Nutaarsiassat innersuussat