Akileraarutitit sumut atorneqartarpat?

Eqqarsaatiginikuuiuk akileraarutitit sumut atorneqartarnersut? Akissarsiappit katillugit 70-80%-ipajaavi akileraarutitigut akitsuutitigullu nunatta karsianut akiliutigisarpatit.

Taamaattorli peqqinnissaqarfipput artorsangaarmat nakorsiaraluaannartarpugut nipaallisaatinillu tunineqaannarluta. Inoqatinnguagummita qassit taamatut annaavagut?

Akileraartuartaraluarlutalu kigutilerisuliarnissaq ajornangaarpoq. Akissaqarluaruttalu aatsaat namminersortumut suliaritissinnaallutigit.

Tupigusuutigineqartarporlu inuit akisussaassuteqaratik sulinatik pisartagaqaannartartut. Immaqaluunniit akilersinnaanerpaaq ujartuinnarnerpaat? Ilumut tupigusuutissaava?

Qinersiartortarpugut neriulluta qinikkatta isumagissagaatigut, neriulluta qinigarput sullissilluassasoq. Eqqarsaatigisarnerparpulli qinikkatta akileraarutigut akisussaaffigilertarai?

Qinersiartortuarpugut annerpaamik neriorsuuteqartoq qineriartorlugu. Taakkuli neriorsuutai eqquutsinneqarpat? Nammineerlutami taakku neriorsuutit akiligassaraagut.

”Ilinniartitaaneq nunatsinni akeqanngilaq” Akileraartartuusugut tamatta akilersugaraarput. Taamaattorli ilinnialertut naammassisullu suli ikippallaarput.

Ilinniarneq akilersinnaanerussagaluarpoq akileraaruterparujussuagut iluamik aqunneqartuuppata, akileraarutigut atorluarneqanngippata apparterujussuaraanni ajunnginnerunngila?

Akileraarutitta aqulluarneqarnissaat kiap akisussaaffigivaa? Qinersisartuusugut immaqaluunniit qinikkat? Tamavitta akisussaaqataavugut. Qanoq taava aaqqissavarput?

Apeqqut uteqqissavara: Akileraarutitit sumut atorneqartarpat? Oqarfigineqassajunnarsivutit aningaasanut inatsiserujussuaq atuassagit. Immaqa paaseqinagatsigu sumut atorneqartut?

Taamaammat Atassummiit upernaamut siunnersutigaarput atuaruminartumik akileraarutigut sumut atorneqartarnersut saqqummiunneqartalissasut.

 

Illit akileraarutitit sumut atorneqassappat?

 

Aqqalu C. Jerimiassen
Siulittaasoq, Atassut

Nutaarsiassat innersuussat