Ukioq 2021 qujanaq, ukiorlu 2022 tikilluaqquinnariartigu.

Ilaqutariinneq sukarsuuvoq tamani pingaarnerpaaq inuiaqatigiit ingerlarnganni, neriuutingaaralumi tamassi juullikkut kissalaarnermik, toqqissinermik ilaqutariittullu nuannersumik atorsimassagisi.

Juulli tassaammat ilaqutariittut naleqartitatut pilluarluni ataatsimoorfiusartoq.

Oqartuartarpugut juulli meeqqat pigissagaat, neriuutigingaarparalumi meerartannguagut sinerissamiittut juullikkunni toqqissinartumik misigisaqarsimassasut, taamaattorli peqquteqarlutik arlaannik artornartunissaaq nalaataqarsimasut meerannguit eqqarsaatinniitingaarpakka.

Ukioq 2021 kingumut qivialaassagaanni pisarnertut pisorpassuaqarsimaqaaq, malunginanngitsuugassaanngilarli, maanna ukiup aappassaa nualluussuup Covid19-ip sorpassuartigut eqqorsimammatigut.

Qujamasuutissalli arlaqaqaat, naak nunarsuup ilarujussuani sakkortungaatsiartorsuarmik inuillu inuunerannik arlalippassuarnik naleqarsimaqisoq nunatsinni immitsinnut paarilluarsimaqaagut. Tuniluunnerillu aallarteqqittaraluartut tamavitta akisussaassutsimik annertuumik peqarluta tuniluunnerupappartipallattarnera inuiaqatigiittut tupinnaannartumik pikkoriffigisinnaasarlutigu, takoreerparputtaarmi soorlu Upernavimmi tuniluunneq annertoorsuarmik aallartikkaluartoq innuttaasut imminnut piumaffiginermikkut, sukkaqisumik qisuariarfigimmassuk kinguneqarluartumik.

Qinersinerit 2021-imi qaleriit ataatsikkut ingerlanneqarsimapput, taassumattaarlumi annertuumik partiimut mikisumut unammillernartortaqarnerattaaq ersarippoq. Ulapinneq annertoqisoq ingerlanneqarsimavoq, kinguneqarluarneralittaaq Atassummiit takusinnaalluarlugu nuannaaqaagut.

Atassut nunguttussatut siulittuutiginiarneqartarsimaqaaq qinersinerit arlallit kingulliit kingumut qivialaassagaanni, maannali tamanna mumisikkiartorneqalersimasoq takuneqarsinnaalermat nuannaarutissaalluinnarpoq. Ukiunimi 26-ini partii milliartuinnavissimavoq qinersisoqarneri tamarluinnaasa, 2021-imili qinersinermi perngaammik killormut tamanna saatinneqarpoq, annikikkaluamillu taasisitigut siuariaateqarfiulluni.

Siuariarnerli partiip ingerlarnganut qaammaallatsitsisutullusooq ippoq, neriuummik annertungaartumik tunniussaqarluni.

Qinersineq 2021 inuiaqatigiinnut siuttoqarnitta allanngorfigivaa, naalakkersuisooqatigiiusimasut atorunnaarlutik nutaanik nunarput naalakkersuisoqalerpoq.

Naak qinersinerup inernerisa takkutereernerisa kingorna Atassut naalakkersuisooqatigiinnut pulasinnaanissanut ilimasuttoqarsimasinnaangaluartoq, Atassut Naalakkersuisooqatigiit avataannut inissilluni ikorfartortitut inissippoq.

Toqqammaviit annersaattut uani siunertaalluni; Atassutip partiitut naleqartitarilluinnakkani sorlaqarfini ukiorpassuarni naalakkersuisooqataajuartarsimanermigut pilliutigisarsimasani pilliutigeqqissanngikkai siunertaasimalluni.

Partiitut talerperlertut inissinneq, Naalagaaffeqatigiinnerup pingaarutilittut attakkallarneqarnissaanik siunnerfeqalerneq naalakkersuisooqataanikkut pilliutigerusunneqarsimanngillat.

Oqartoqarsinnaavorli partiitut angusat ajunngilluinartut anguneqarsimalersut, naak Naalakkersuisooqatigiit avataanni ikorfartortaannartut inissisimasimangaluarluta.

Kommunimut qinersineq angusaqarfiulluarsimavoq, naak uggornaraluartumik kommunit annersaanni isertitaqarfiunngikkaluartoq, nunap sinnerani pitsaasumik aalajaatsumik inissiffiusimavoq.

Kommunillu sinneri tamaasa isigissagaanni tanngassimaarutissaasumik inissiffiuvoq, borgmesterinngortitsinerni tamani Atassut tunuliaqutseeqataalluni, ilaatigullu allaat Qeqqata Kommuniani borgmesterip tulliata aappaanik peqalerluni.

Naalakkersuisooqatigiinnulli ikorfartortaanertaaq annertungaartumik Atassummut unammillernartunik peqarsimavoq, partiip sorlaqarfianik sorsuuteqarnermi ersarimmat partiinut saamerlernut suleqateqarniarneq imaannaanngitsuinnaanngittoq unammillernartorpassualillu.

Pisorli nutaarluinnaq takkuppoq, naak naalakkersuisooqatigiinnut ikorfartortaanikkut sulineq ajortutut isikkoqanngikkaluartoq, partiip toqqammavimmigut anguniangai ersarissumik suliarissallugit piffissaasorinarsilersimavoq.

Talerperliit suleqatigiit inatsisartut ukiakkut ataatsimiinnerat 2021 naammassilluinnalersoq pilersinneqarpoq, tassanilu Atassut Demokraatillu ukiorpassuarni akorngiminni sorsuuttuarsimaneq unitsikkumallugu partiit talerperlertut suleqatigiilerniarlutik atsioqatigiipput.

Siulittaasutullumi nuannaarutiginngitsuunngilara, kiisami inuiaqatigiittut ingerlanitsinni perngaammik talerperliit partiinik saamerlernik pitusimaneqaratik politikkertik aalluttussanngormassuk, siunissamullu taanna imaannaanngitsumittaaq tikkuussivoq, politikkip qalipaataanik erseqqinnerusumik nuna tamakkerlugu oqariartortoqartalernissaanittaaq ersertitsilluni.Taamaakkaluartorli, naak illuatungiliuttutut inissikkaluarluta, illuatungiliunniaannarluta putusaarineq inuiaqatigiinnullu puupassaarineq atornagu akisussaassueqaqataalluta inissisimassaagut, suleqatigiiffigisinnaasagullu assigiinngitsut partiip qalipaatai avaqqullugit suleqatigiiffigisassallutigit, soorluttaarmi tamanna takutinneqartoq aningaasanut inatsisissap atsiorneqarnerani.

Inuussutissarsiorneq maanna tamaat isigissagaanni, ernumaammernarsinnaasut suli arlallit pigaagut, naak annertungaartumik Atassummiit aalisarneq tapersersungaringaluarlutigu, oqartuartarpugut siunissaq ungasinnersoq isigalugu aalisarneq kisiat aningaasarsiorfittut isumalluutigiuarsinnaanngilarput, aningaasarsiorfissanik nutaanik pilersitsisariaqarpugut.

Aatsitassarsiorneq eqqarsaatigalugu, Atassummi piumasarisimangaluarparput innuttaasut taasitinneqartariaqartut uran eqqarsaatingalugu, ersarissartuarlugulu inatsisartunut qinersineq tassaanngitsoq innutaasut taasitinneqarnerat. Sumiiffimmi ataaseq aallavigalugu nunatta sinnerata eqqornerlunneqaratarsinnaanissaa ernummatigisimagatsigu. Inuiaqatigiittummi kissaaterpassuaqarpugut aaqqiissuteqarfigitikkusutatsinnik, tamakkuli tamarmittaaq akeqarput, ila akikinngeqaat! Aningaasarsiorfissanillu nutaanik peqalersingata akissaqarfigilernissai sinnattuinnaajuassaaq kusanartoq.

Isertuanatalumi taamaattumik Atassummiittaaq oqaatigiuarparput, Naalagaaffeqatigiinnerup suli iluaniippugut, ajuusaarutissaqanngeqaagullu Naalagaaffeqatigiinnerup iluaniitilluta periarfissat atortuassallugit inuit atungaasa pitsanngorsarnissaannut. Nuna nammineertoq pilersinneqarsinnaanngilaq inuk nammineertoq pilersinneqaqqaanngippat, oqartoqaannarsinnaanngilarmi naalagaaffeqatigiinnermit aningutta atukkagut tamarmik aqagu aaqqereersimassapput, ukuuku pisuusut taamak maanna atungaqaratta.

Nunamiippugummi kiffaanngissuseqarluta, naqisimaneqanngilagut avataaniit qanoq iliussanersugut iliussannginnersugullu, inatsisilli inatsisartoqarnitsigu tnaalakkersuisoqarnitsigullu tamaasa suliarisinnaalernikuuagut namminersornitsigut. Tamassumallu malittaanit tikkuagassaqanngilagut allat pisuutissallugit, aaqqinniangassarmi uatsinniimmat inuiaqatigiinni, iliuuseqarnitsigullu tamakku malunnaatilimmik aaqqeeqataaffigisinnaavagut.

Pisortat iliuuseqarnissaai utaqqinagit, nammineq innuttaaqataasutut akisussaassuseqaqataalluta nikussaarnitsigut inuussutissarsiorneq nunatta iluani avammullu niuernikkut nukittorsaaqataaffigilluarsinnaavarput, inuiaqatigiinni atukkagut pitsaanerulersikkumallugit. Arlaatigut nammineq inuussutissarsiortutut namminersortutut ingerlalernissatsinni tamanna nammineq assatsinniippoq, apeqqutaaginnarporli sapiissuseq inuttut sumiinnersoq. Illillu kaammaattorumavakkit kinaangaluarnersutit, sapiissuseq pigiuk, nammineq sulinikkut angusat annerungaalertarmata.

 

Naalagaaffeqatigiinnerup attakkallartariaqarneranik oqartarnerput sapertuunermik, sinnassangaanermik nangiarnermilluunniit aallaaveqanngilaq, maannali innuttaasutut ulluinnarni atukkagut ajorseriannginnissai isumannaatsumillu inissisimanissai salliutikkatsigit isertuanata naalagaaffeqatigiinnerup pingaarutaa oqaatigisarparput. Naalagaaffeqatigiinnermut akuersaartuuneq kalaaliussutsimut nikanarsaataasinnaasutut paasineqartariaqanngilaq, ullumikkummi oqaatsigut illersungaasumik tamatta ulluinnarni atortuarpagut, kalaaliussuserpullu innarlerneqarunnanngilaq naalagaaffeqatigiinnermut ataannaralluarnissamik illersuinikkut.

Imaaqqinnaartariaqanngimmami, kalaaliussangaanni suna tamaat akingalugu naalagaaffinngornissaq kisiat illersortariaqartoq. Kinguaassagut eqqarsaatigisariaqarpagut, inuunissaannik artorsinniassallugit anguniangaqassanngilagut, naalagaaffeqatigiinnerulli iluani peqqinnartumik ineriartorneq aallussinnaavarput, inuiaqatigiinni isumagisariaqakkagut ikiortariaqakkagullu kivissinnaanissaat eqqanaarumallugu.

Nunarsuarmioqataaleriartornermi inuiaqatigiit malinnaalluartariaqarpugut, suut nutaat assigiinngitsut takkuttartut tikilluaqqusinnaasariaqarpagut qularneq tunulliutiallalaarlugu.

Namminerlu isertuutissanngilara, inatsisartuni eSportsannertuumik eqqartorsimagakku, maannalu piviusunngorsinnaalernissaanut aqqut siulleq eqqanaarsimalerlugu. Nunarsuarmioqataanermi annertuumik unammillersinnaalluartunik nunatsinni peqaleraluttuinnarpugut, taakkuuppulluttaaq naleqartillugit iperarnaversaartuagassagut.

Nipilersorneq nunarsuarmioqatitta niuffaffissuaraat, nunatsinnili ajoraluartumik ”taamaallaat” sunngiffimmi sammisassatut piorsarsimassutsikkullu suliatut annerusumik isigineqarnerulluni. Tamanna annersumik nikisittariaqalerparput, nipilersortartuuneq annertuumik inuussutissarsiutitut inissisimalersinnaanissaa suliassaraarput, ajukkunnanngivissunimmi nunarsuup sinneranut appakaalluarsinnaasunik peqaratta piumassuseqarluartunik. Taakkuppulluttaaq naleqartitatut isigalugit siuarsaavigisariaqarluinnakkagut.

Aningaasarsiornikkut nunarput ukiut tamarluinnapajaavisa naammattusaarineq illuaniit illuanullu nussuisaqattaarneq annertuumik atorlugu ingerlajuarpoq. Maannalu imarpik qulaallugu marlunnik mittarfittaarnissatta qallingaluttuarnerani siunissaq ungasinnerusoq isigalugu aningaasaliisarnerit ingerlattariaqalerpagut. Aningaasat millionilikkaat piinnarnagit milliardilikkaalli suliat annertoorujussuit eqqarsaasersuutigisinnaasariaqalerpagut, ukiunut sisamaannarnut inatsisiliortarneq piunnaarlugu, kinguaassattali tamarmik malugilluarsinnaasaannik siuariaataasussanik ukiunut 30-40-inut isigisumik aningaasaliisarnerit inuussutsissarsiornikkut siuariartuutaasussat ukkatarinerusariaqalerpagut.

Sanaartornerup piffippassuarni unittooqqanera eqqarneqartuartarpoq, maannalu periuseq taannatoqaq atorneqartuartillugu aallanngortoqangaarsinnaanera qularnarpoq. Sanaartungassat annertuut aningaasalersorneqartalernissaannut, ukiunut sisamaannarnut ilusiliinerit atornagit, ukiunulli qulinut siaarlugit sanaartugassarparujussuit sineriak tamaat inerisaavigisinnaalernissaannut sapiissuseqarnerulertariaqarpugut. Naalagaaffeqatigummi qeqertaarannguani najugallit eqqarsaatigissagaanni, sapiissuseqarnermikkut ukiorpassuarnut isigisumik aningaasaliinermikkut inuussutissarsiornikkut inuiaqatigiittullu ingerlanermut eqaannerungaartumik iliuuseqarsimapput, takusinnaavarpullumi maanna aningaasarsiornermikkut killiffiata qanoq siuariaateqarfiusimatiginera.

Qanortoq tamassi ukiorsuaq nutaaq neriunnermiknuannaarnermillu peqarfigingisiuk, tamassi immissinnutkaammattoqatigiillusi ilaqutariittullu toqqissinermik peqarlusi.

Tamassi juullimi ukiortaassamilu pilluaritsi.

 

Aqqalu C. Jerimiassen

Siulittaasoq, Atassut