Kalaallit Nunaanni eqqartuussivikkoortumik nalunaarsuineq digitalinngortinneqartariaqalerpoq

Aqqalu C. Jerimiassen, Siulittaasoq Atassut

Christoffer Melson, Folketingimi Ilaasortaq, Grønlandsordfører for Venstre

 

Eqqartuussiveqarnermut oqartussaaffik suli Kalaallit Nunaani oqartussaaffigineqanngilaq. Taamaattumik Kalaallit Nunaanni Danmarkimilu politikkerit qanimut suleqatigiittariaqarput, pitsaanerpaamik naapertuuttumillu oqartussaaffik ingerlanneqassappat. Uanilu pineqartoq tassaavoq eqqartuussivikkoortumik nalunaarsuisarneq, tassa pigisanut tunngatillugu eqqartuussivikkut nalunaarsuineq, assersuutigalugu illumik piginnittuunermut uppernarsaat. Nalunaarsuisarnerullu digitalinngorsarneqarnissaa pisariaqalersimavoq illusinermi, illumillu pisinermi. Ajoraluartumillu nalunaarsuineq eqqartuussiveqarfiit marluk akornanni massakkut inissisimavoq. Danmarkimilu nalunaarsuisarneq digitalinngorsareersimavoq, nunatsinnilu suli digitalinngorsimanani.

 

Danmarkimilu digitalinngorsaasimanerup kingunerisimavaa sukkanerusumik, sillimanarnerusumik pitsaanerusumillu nalunaarsuisarneq. Kalaallit Nunaannili paasissutissat assigiinngitsut nammineq suli ujartoqqaarneqartartussaapput, soorlu kikkut piginnittuunersut, taarsigassarsianut sallunaveeqqusiineq il.il. Taamatullu nammineq allakkatigut nassiussuisaqattaartarneq sivitsorsaataasarpoq, ilaatigullu illusinissamut isumaqatigiinniarneq akitsoriartorsinnaasarluni, aningaaseriviit qularnaveeqqusiinissaat piumasaqaatigisinnaasarmassuk, eqqartuussivikkut nalunaarsuinerup inissivinnissaata tungaanut.

 

Taamaammat eqqartuussivikkoortumik nalunaarsuisarnerup digitalinngorsarnissaa innuttaasunut suliffeqarfinnullu iluaqutaalluarsinnaavoq eqaannerusumik ullutsinnullu tulluarnerusumik suleriaatsimut ikaarsaarnermut. Maanna Danmarkimi Naalakkersuisut kaammattorpagut piaartumik Kalaallit Nunaanni ikaarsaariarnissamut digitalinngorsaanissamullu suliaq aallarteqqullugu.

Nutaarsiassat innersuussat