Peqqinnissaqarfiup aaqqissoqqinneqarnissaa pisariaqarpoq

Ilisimariikkatsituut kalaallit nunatsinni isorartoqisumi nakorsassaqarnerup inissisimasarsimanera naapertorlugu Dronning Ingrid-ip napparsimmavissuata atuutileqqaarnerminiilli ullumikkumut, napparsimmaveqarfiit qullersaqarfiattut sinerissami innuttaasuniit suliaritikkiartorfiusarlunilu uninngavigineqariartortarsimavoq.

Taamaattorli isumaqarpunga pissutsit taamatut inissisimanerat ullutsinnut nalimmassaavigineqarnissaat pisariaqalersimasoq, ullutsinnimi nunatsinni illoqarfiit annersaanni 18.000-t missiliorlugit inoqalersimasumi napparsimmaveqarfik ulikkaaqqajualernikuuvoq, tamassumalu nassatarisaanik Nuummi najugallit ilaatigut ulikkaarussaaqqasalersut tusarsaajualerpoq.

Nunatsinnilu isorartuumi peqqinnissaqarfinni atugassarititaasut Nuummilu najugaqartunut napparsimmavissamik pilersitsinissamut Atassut maanna oqallissaarerusuppoq, tamannalu periarfissanik assigiinngitsunik eqqartuiffigineqarsinnaasoq Atassummiit isumaqarpugut.

Sinerissami illoqarfinni tamani nakorsassaqartarnikkut annertuumik inerisaasoqarnissaa pisariaqarpoq, tassungalu ilanngullugu aamma Nuummi najugallit napparsimmaveqarnissaat siunertaralugu Dronning Ingrid-ip napparsimmavissuata allilerneqarnissaa pillugu imaluunniit taassuma saniatigut napparsimmavimmik pilersitsoqarnissaa pillugu Atassummiit oqariartuutigaarput.

Atassummiillu eqqaasitsissutigissavarput peqqinnissaqarfiup ingerlanneqara piffissami matumani nunatsinniit tamakkiisumik kivinneqarsinnaannginnera tunuliaqutsiullugu peqqinnissaqarfimmik ingerlatsineq qallunaat naalagaaffiannut utertinneqarnissaanik oqariartuuteqarnikuugatta.

Oqariartuutigisarpullu tamaniit itigartinneqarnikuummat piffissanngorpoq peqqinnissaqarfitta annertuumik pitsanngorsarnissaa. Allanngortoqassanngippammi uppernarsiinnassavarput peqqinnissaqarfimmut oqartussaaffik kivissinnaanagu.

Inuiaqatigiimmi peqqinnissaqarfimmit naammaginartumik tamakkiisumillu sullinneqarnissaq pisinnaatitaaffigalugulu pisariaqartippaat.

 

 

Inussiarnersumik

Angutinnguaq Heilmann

Nutaarsiassat innersuussat