Inuusuttortagut nunatsinni sakkutuunngorniarsinnaanissaat Naalakkersuisut sulissutigisariaqarpaat

Nunatsinni sakkutuunngorniarnermut misilitsittoqarsinnaaleqqinnissaa Atassummiit kissaatigaarput. Sorsugiartalernissamut siunertaqarluta oqariartuuteqanngilagut, nammineerlutik kissaatiginngippassuk. Illersornissamut naqqaniit ilinniartitaaneq inuup inuttut ineriartornissaanut iluaqutaalluarsinnaavoq, avammullu nunarsuatsinni takumasaqalernissaq siunertaalluni.

Naqqanik ilinniagaq naammassigaanni ingerlariaqqinnissamut periarfissiisinnaasariaqarpugut, soorlu mekanikeritut (biilit, lastbiilit, timmisartut il.il.), kiisalu officerinngorniarnissamut ilinniaqqissinnaanissaq periarfissaalersittariaqarparput, siuttutut aqutsinermullu piginnaasat qaffassarlugit. Atassummiit pingaartilluinnarparput inuusuttortagut amerlanerpaanik periarfissinneqassasut toqqagassarpassuaqassasullu. Inuusuttortagullu piginnaasamikkut toqqammavissaqalissapput ingerlariaqqinnissaminnut, sakkutuutut immaqaluunniit allami, nammineerlutik iluaqutigisassaat kiisalu aamma inuiaqatigiinni.

Atassutip neriuutigivaa Naalakkersuisut takusinnaassagaat Nunatsinnut suut iluaqutaasinnaassanersut siunissami, periarfissallu nutaat ammaallugit, inuusuttortattalu Arktisk Kommandomi akuulernissaat periarfissaalerluni.

 

Nikolaj Rosing

Politikkikkut siulittaasup tullia, Atassut

Nutaarsiassat innersuussat