Akiliisitsiniartarnermut oqartussaaffik Kommuninut nuunneqarli

Ukiuni kingullerni Kalaallit Nunaanni innuttaasuniit Pisortanut akiitsorineqartutut taakkartorneqartut millionilikkaarpassuartut saqqummiunneqartarpoq, allaammi ukioq manna februaarip pingajuanni saqqummiunneqartoq naapertorlugu akiitsut katillugit 863 mio koruuninik amerlatigineragaapput.

Eqqarsaatigineqarnerusariaqalerpoq, akiitsorineqartut qanoruna aammalu kikkunukua akiitsut pilersitaat?

Pisortanut akiitsut taamak amerlatigilersimaneri aallaavigalugit Pisortanut akiligassarineqartunut akilersuisitsiniarneq siunertaralugu, akilersuinissamut atugassiamik pilersitsisoqarnikuuvoq tassanilu amerlasoorpassuit eqqugaanikuullutik.

Inuit ataasiakkaat akiitsui ataatsimut katillugit soorunami ikigisassaanngikkaluartut, akiitsut taamak amerlatigilersimanerannut peqqutaaqataanerpaaq tassaavoq, suliffeqarfinnik ilaatigut annerusumik minnerusumilluunniit suliaqartartut, arlalinnillu sulisoqarlutik ingerlatsisartut akileraarutinut akiliisannginnerat.

Tamassumalu nassatarisaanik soorunami akiligassat sukkasoorujussuarmik qaffakkiartortarput, suliffeqarfillu akileraarutinut akiliineq ajortoq, Pisortanit akiliisinniarneqaleruni suliffeqarfimmik ingerlatsisut ingerlatartik matoriarlugu, suliffeqarfimmik allamik ammasarput suliatillu nangillugit.

Akiliisitsiniartarnermut kujataani iliuutsit suliniutaasimasullu pitsaasumik inerneqarsimasut nunatta sinneranut aamma atuutilernissaat kissaatigaarput. Maluginiarneqassaarlu innuttaasut qanimut sullinneqarnertik periarfissinneqarnertillu iluaqutigigaat. Taamaammat Atassummiit qineqqusaarnermi aamma uteqattaarsimasarput, tassalu qitiusumiit akiliisitsiniarnermut oqartussaaffik Ilanngaassiviup atuukkunnaarnissaa ilungersuutigigatsigu.

Pisariaqarporlu akiliisitsiniartarnermut oqartussaaffiup Kommuninut nuutsinneqarnissaa.

 

Angutinnguaq Heilmann