Imminut pilersorsinnaajunnaarneq isiginngitsuusaarneqarpoq

ATASSUT QAANAAQ:

Piffissami sivitsortumi Avanersuarmi piniartut soqutigineqanngitsutut pissusilersorfigineqarnerat akuersaarneqarsinnaanngilaq.

QILALUKKANIK PISASSANIK qinnuteqaqqinnerat tusaanngitsuusaarneqarpoq.

Inuk imminut pilersorlunilu napatittoq anguniaraanni politikkikkut suliniutit ersarinnerusariaqarput.

Maannamut qaammatini arlertuni Avanersuarmi piniartut isertitsissutigisinnaasaminnik inuussutissarsiorfissaqanngillat.

Qaanaami puisit amiinut/neqaanullu tunitsivissaqanngillat, aalisakkanullu maannakkut tunitsivissaqaratik.

Piniartut ilaquttatik namminerlu napatinniarunik, inigisaminnut eqqaanermut kiassarnermut, innaallagissamut assigisaannullu aningaasartuuteqartariaqartut isertitsivissaqanngitsut isiginngitsuusaarnerat naammaleqaaq.

Tassami piniartut kalaallit nerisaqarnerminnut pissaqarniarnerannut sinerissamuttaaq pilersuisuummata tamanna maannakkut piaartumik iliuuseqarfigineqartariaqarpoq, qilalugartassanik pisasseeqqinnikkut.

Piniartormi isertitsivissaqarani piniutini angallatigisani ajutoorpat qanoq akiliisinnaassava?

Piniartoq piffimmi imminut napatinniartoq suffissaarutsillugu ikiorsiissutinik tunioraannarneqarsinnaanngilaq, tassami sumiiffimmi suliffissamik imaalitsiaannaq suliffissarsisoqarsinnaanngimmat.

Kalaallit nunaata katitigaanerani maanna piffinni assigiinngitsuni COVID-19 atuunnerani suliffeqarfippassuit pisortanik ikiorserneqarput ingerlaannarsinnaaniassammata sulisorisaminnillu tigumminniinarsinnaaniassammata.

Maannali PINIARTUT AVANAERSUARMI inuutissarsiutimik ingerlatiinnarsinnaaneranut ikiorserneeqarsinnaanngillat.

Tamannalu Kalaallit nunaata katitigaaneranut tulluutinngilluinnartoq ATASSUT QAANAAQ mit isumaqarpugut.

ATASSUT QAANAAQ

Siulittaasoq

Marie Peary

Nutaarsiassat innersuussat