Annertuumik aaqqissuusseqqittariaqarpugut

Amerlasuut isumaqartarput Atassut siunissamut takorluugaqanngitsoq. Tamanna qangalili qaangereersimavarput, tassami siulersuisuunerni, ulluinnarnilu aqutsisuni oqaloqatigiittuarpugut, sorpassuit assigiinngitsut eqqartorlutigit soorlu aatsitassarsiorneq, nualluussuarmut tunngasut, aalisarneq, ilinniartitaaneq, peqqinnissaqarfillu il. Il.

Ersarissumillu tunngaviusumik isummagut nittartakkatsinni allaqqapput atassut.gl-mi atuariaannarnik. Tamatigullu kalaallisut qallunaatullu allaqqasarlutik. Nittartagarput alakkariassagissi, nutaarsiassaatigullu atuarlugit, qimerloorlugillu kikkut qinigaatitarinerigut.

Ilumut kissaatigigaluarpara Inatsisartuni qinigaatitagut qinersinerup tullissaani marloriaammik amerlanerulissasut. Taamaalilluta periarfissaqarnerulissagaluarpugut sunniuteqarnerulernissatsinnik. Iluareqqusaarluta neriorsuuterparujussuaqarneq ajorpugut, nalunngilarpummi aningaasat killeqartut.

Covid-19 tunngavilersuutigineqaqattaarpoq, taamaattorli nuallussuaqarsimanngikkaluarpalluunniit qularinngilara suli attartortoqarniarsimasussaareeraluartoq. Taamaammat Atassummiit kissaatigaarput siunissamut qajannaallisakkamik aningaasatigut politik ingerlanneqartariaqaraluartoq. Imaapporlu ilaatigut sipaarfiusinnaasunik nassaartariaqarnissaq, allanillu aningaasanik isaatitsiffiusinnaasussanik ujartuinissaq.

Atassummiit Nunatsinni aqutsinikkut aaqqissuusseqqinnissaq siunertaraarput, oqartussaaffinni tamani. Isumaqarporlu suleqatiserinnippugut nunatsinni aqutsinikkut allanngueqataanissamut. Isumalioqatigiisitarsuit ilai peertariaqarput, suleriapallassinnaaneq annertusarlugu, kiisalu pisortani naleqqussaaqqinneq ingerlallugu. Eqiterussinerujussuarlu unitsittariaqalerparput, pisortat akisussaaffipparujussuarnik tigooraajunnaarsillugit, susassaqartunullu allanut akisussaaffinnik siammartiterineq aallullugu, innuttaasunut, suliffeqarfinnut, naalagaaffimmut kommuninullu. Ila tamakku oqaatigissallugit pikkunaappalukkaluassusia, taamaattorli pisariaqarluinnarput. Sunami tamaat peerniarsarinngilarput, pingaarnersiuinerulertariaqarpugummi pisariaqarnerpaallu aallunnerulerlugit, assersuutigalugu isumaginninnikkut, peqqissusermullu annertuumik suliaqarnerulluta.

Unammilligassat suli annertusiartorneranni, sivitsorsaajuarnitsinnilu, innuttaasunut tamanut aamma artukkiinerat annertusiartussaaq. Nunarput pinngortitamut eriaginnittuusutut avataaniit isigineqartariaqarpoq, erngup nukinganik innaallagissiorneq annertusarlugu, ikummatissallu atugaanerat annikillisarlugu. Anorip nukinga, seqernullu nukinga, allaallu immap sarfaata nukinga atorlugit ineriartortitsisinnaaneq soqutiginarluartumik aallunneqarsinnaagaluarput. Periarfissat amerlaqaat , apeqqutaaginnarporlu aningaasaatigut qanoq agguataassanerlugit.

Sullarissorsuarnik ulikkaarpoq, sulilu pikkorissartinneqartarnermikkut, ilinniartitseqqittarnikkullu  pikkorissiartuinnartussat. Suliffeqarfiit kiffaanngissuseqarnerat pingaartillugu ineriartornissaannut killilersornaveersaassavagut, aningaasaqarnikkut suli nukittunerulissagutta. Atassutip siunertarilluinnarpaa pilersitatta nalingi suli annertusarluarsinnaanissaannut aqqutissiuussilluarsinnaasugut. Suliffeqarfitsinnut ingerlanerinilu annertuumik iluaqutaassaaq, kiisalu tamakkiisumik nunatsinni aningaasaqarnmikkut kiviteqataassallutik. Pingaarnerpaarli tassaavoq, ersarissumik siunnerfimmik nutaamik ingerlasariaqarneq aallartittariaqarparput.

Atassummiilli uteqqissavarput, imaaliallaannaq aaqqeeriasaartoqarsinnaanngilaq. Aamma nunaqarfinnik matooraanikkut ajornartorsiutigut qaangernavianngilagut. Oqartussaaffiit tamaasa aaqqissuusseqqinnikkut tulluarsartariaqarpagut, piffissap sivisuup iluani. Taakkulu tamakkiisumik oqartussaaffiit suleqatigiillualerunik inuiaqatigiinni pitsaasumik takussutissartaqalerumaarpoq.

 

Nikolaj Rosing

Atassutip politikkikkut siulittaasup aappaa

Nutaarsiassat innersuussat