Umimmanniarnissamut ulluliineq kingusippallaarpoq

Annertuumik allannguiniaraanni, soorlu Umimmanniarnermi piniarfiit piffissaannik allannguinerni. eqqortumik peqqissaartumillu periuseqartariaqarpoq. Taamaakkaluartoq ataatsimut isigalugu arlalippassuartigut tamanna atuutsinneqartariaqarpoq. Isumaqartunut 15/8-2020 kingusippallaartoq akuleruppunga.

Inuit qangaammalli piniariarnissamut sulinngiffeqarnissaminnik pilersaarusioreerput, taamaanngippat aamma piniartut atorfeqarnissaminnik pilersaarusioreerlutik. Sunngiffimmi pinialuttartut ulloq (1/8) naapertorlugu sulinngiffeqarnissaminnik inniminniisimapput, sulinngiffeqarnersiutit aammalu aningaasartuutit assigisaalu allat sulinngiffeqarnermut tassunga atorneqartarput, arlalippassuarnut sap. ak. marlunnik sivisussuseqartumut.

Taamaasillutik umimmanniarnissaminnut angumersinavianngillat. Piniariarnissamut sulinngiffeqarnissami aningaasartuutit aningaasaqarnitsinni initoorujussuusarput, taamaammallu imaasiallaannaq piniariarnissamut atatillugu sulinngiffeqariaannaanani. Ajornartorsiutip tullia tassaassaaq meeqqat inuusuttullu atuarfimmi piumasaqaataasunut maniguunnissaq eqqarsaatigalugu aaqqiagiinngissutit pilersinneqassanngippata umimmanniaqataasinnaanngimmata. Meeqqat inuusuttullu inooriiaatsitsinnik ilisimaarinnilernissaat pingaaruteqarpoq, taamaasillutillu sapinngisaq tamaat aamma kinguaariinnut tulliuttunut ingerlatitseqqiisinnaassallutik.

Piniarneq piorsarsimassutsitsinnut ilaalluinnarmat oqartussanut matumani kajumissaarutigissavara una ulloq 1/8-imut uterteqqullugu.

Nikolaj Rosing

Politikkikkut Siulittaasup Tullia

Atassut

Naalakkersuisut siulittaasuat suliamut attuumassuteqarfigisamut qanippallaamik aaliangeeqataanera

Inhabilitet – Tamanna Naalakkersuisut siulittaasuata annertuumik eqqumaffigisariaqaraluarsimangaa sakkortuumik oqaatigerusunnarpoq. Suliamut attuumassuteqarneq qanippallaarnerluunniit pillugu tamatsinnut atuuttumik peqarpoq, imaassanngilaq Naalakkersuisut siulittaasuungaanni tamanna allaanerusariaqartoq.

Naalakkersuisut siulittaasuata angallatini attartortinnissaa nammineq akisussaaffigaa inuttut, taamaattorli 24.april attartortissimaguniuk eqqarsaatigilaarsimasariaqaraluarpa 11.maj arnarlunniarnermi pisassiissutit ilaneqarnialermata suliamut qanippallaamik inissisimanini.

Atassummiik tamanna sakkortungaatsiartumik isorisariaqarparput, sumulluunniimmi toqqaannartumik attuumassuteqarfigisatsinnut inatsisitigut aaliangersaanermi peqataaqqusaannginnatta.

Eqqartuussisuusaassanngilagut, uanili maanna pisumi ajoraluartumik aningaasartaqarlunilu pimmat tupinnarpoq naalakkersuisut siulittaasuata minnerpaamilluunniit tamannartaa eqqarsaatigisinnasimanngippagu! Naammaginanngilaq, pissaanermik atornerluinertut allaat naqissuserneqarsinnaalersinnaavoq ikiuiniarnermilluunniit naleqaraluarpat aaliangeeqataasimangaanni aaliangeeqataaneruvoq tassa. Tamassumanilu Naalakkersuisut siulittaasuat aaliangernermi peqataasimanngilluinnartussaangaluarpoq.

Eqqunngitsoqarsorisaqarutta uparuaassaagut, imaanngilaq eqqartuussinerusoq. Tusagassiorfiit pisussaaffitsik atorlugu apeqqusigassat uparuagassallu sakkortuumik itisilertikkumappatigit imaanngilak eqqartuussinerusoq. Inuiaqatigiinni eqqunngittuusorisaqartilluta, tusagassiorfiit suliartik suliareqqusaanngippassuk ila taava aqutseriaaseq sunaana taava atorsimagipput? Demokratiiusimanavianngilaq.

Taamatut killissaq qaangerlugu iliuuseqartoqaqattaarneranik isiginngitsuusaartuassagutta, uparuaasinnaanatalu, taamatut pisut, killissanik qaangiisut annertusiartuinnassapput.

 

Aqqalu C. Jerimiassen

Atassutip siulittaasua

Namminiilivinniarpallaarnerup peqqissuserput innarlerpaa

Qanoq ililluta siunissami namminiilivinniarneq akissaqartissagatsigu, ullumikkulluunniit kigutileriffiit iluamik akissaqartinngikkutsigit?

Ukiut 28-it matuma siornatigut Peqqissutsimut Naalakkersuisoqarfik Kalaallit Nunaata tamakkiisumik tiguaa, tamanna kukkunerujussuusoq isumaqarpunga. Oqartoqarsinnaavoq kalaalinngorsaavallaarnerup aamma qinersisartunik iluareqqusaarnerup piliaasa annersarigunaraat, allaat immitsinnut artukkerluta Naalakkersuisoqarfimmik ullumikkut aningaasartuuteqarfigiinnakkatsinnik ingerlataqarneq akilersinnaangitsutut ingerlatsinerusoq takusinnaalluarparput.

Allaallu Peqqissutsimut Naalakkersuisoqarfik Naalagaaffimmut uterteqqinneqarnissaa periarfissatut eqqartortariaqalerparput. Ullumikkut Nunatta sineriaa qiviariarutsigu nakorsassaaleqinerit, peqqissaasussaaleqinerit illoqarfinni nunaqarfinnilu isorliunerusuni maluginiarneqarsinnaapput. Tamanna 1992-ip siornatigut ajornartorsiutaangilluinnarsimavoq, tassami illoqarfinni nunaqarfinnilu isorliunerusuni inissisimagaluaraani nakorsaqarneq, peqqissaasoqarneq ingerlajuarsimammat.

Peqqissutsimut Naalakkersuisoqarfiup oqartussaaffiginera nalilersorneqaqqittariaqalerpoq, tassami akitsuutinik qaffaaginnarluta Naalakkersuisoqarfik ingerlatsinermut akiliisinnaajuaannarnissaa qulakkeerniaannarsinnaangilarput ukiuni 28-ini. Soorunalimi aamma Naalakkersuisoqarfiit uani allat aamma pineqarput, inuiaqatigiit akitigut unammillernartumiipput tamannalu orniginanngilluinnarpoq. Inuk imminut napatittoq piginnaasaanik arsaartorlugu Pisortaniit aningaasanik unammillissanngilai, aningaasat nammineerlutik ulapisinneqassapput inuiaqatigiini akornusiinatik.

Naalagaaffeqatigiineq pingaaruteqarluinnartuunera aatsaat taamak pingaaruteqartigaaq, ullumikkut nunatsinni nunatut akiliisinnaasuserput akitsuutinik sequtserneqarpoq. Inuiaqatigiit artukkerneqarput, nunami maani akitigut inuiaqatigiit unammillerneqarput tamannalu pissusissamisuungilluinnarpoq.

Nuna namminersulivinniarluni aningaasaqarnikkut peqqissutsikkullu ajutooqqasumiit, Inuk peqqissoq nammineersinnaassusilik pingaarneruli. Inuk qitiutillugu.

 

Bentiaraq Ottosen

Atassut