Atassutip Inatsisartuni immikkut ittumik ataatsimiinnermi oqaaseqaataa

Naammagittarnerujussuaq tamatta massakkut ilinniaqqipparput. Eqqaasinneqarpugut ilaquttagut, qanigisagut ikinngutigullu ulluinnarni qanoq annertutigisumik sunniuteqartigisarnersut, qanorlu pisariaqartitsiginerigut. Paasilerunarparpullumi ulluinnarni atukkagut iluarusuutigisavut pitsaasut, taamaaginnartussatullu isigisavut qujamasuutiginerusariaqarigut.

Eqqaasinneqarpugut inuiattut qanoq ataatsimuullaqqitsiginersugut pisuni ilungersunartuni. Eqqaasinneqaqqippuguttaaq inoqateqartugut ulluinnarni inuunermik ingerlatsinissamut artorsaateqartunik, meeraasalu pisariaqartitaannik tamakkiisumik tunniussaqarsinnaanngitsunik. Inoqateqarpugut akisussaaffimmik tigusinissaminnut suli piareeqqanngitsunik, piffissamilu massakkutut ittumi pisussaaffimminnik naammassinnissinnaanngitsunik.

Oqaaqqissaariuarsinnaagaluarpugut inoqatitsinnut, taamaattorli pisariaqalersimammat tamatta peqqinnissarput pillugu inatsisitigut sukaterinissaq pisariaqalersimavoq. Immitsinnut inoqatitsinnullu innimisussinnaaneq paarsilluarsinnaanerlu nammineerluta artorsimagatsigu inatsisitigut inuttut kiffaanngissuserput milliallatsittariaqalerparput, pisortallu pisinnaatitaaffii qaffallugit.

Kiffaanngissuseq pisussaaffiliivoq. Pisussaaffigulli eqquutsissinnaanngikkutsigit kiffaanngissuserput annikilliartussaaq. Periarfissinneqarsimavugullu kiffaanngissusitta attatiinnarnissaanik. Inupparujussuuvugut peqqissaarluta mianersorlutalu pisortat innersuussutaannik malinnittuusugut, inoqativut eqqarsaatigalugit, sanngiitsortagullu illersorniarlugit. Inoqarporli inassutaasunik malinnikkumanngitsunik. Tamannalu tamatsinnut kinguneqarpoq.

Atassummiit paasilluarparput inatsisit sukaterneqartussanngormata Danmarkimi inatsisitigut allannguutit malillugit. Nukingertumik suliassaagaluartoq peqqissaarullugu suliarisariaqarparput mianersortumillu kiffaanngissutsip akisussaassusilimmillu inatsisip sukaternissaa oqimaaqatigiissarlugit. Pisariaqarpormi immitsinnut illersorniarluta asasagullu illersorniarlugit sukkanerusumik iliuuseqapallannissamut inatsisitigut tunngavissaqalernissaq.

Ersarissumik Atassummiit oqaatigissavarput inatsisissatut siunnersuummi § 27-mi pigisanik arsaarinnissinnaanissamut pisinnaatitaaffiliinissaq (ekspropriation) sakkortuumik akerlileratsigu. Pissaaneq taamaattoq annertuallaarujussuarpoq, inuttullu kiffaanngissutsimut kalluaarujussuarluni. Nappaassuarmulluunniit pisumullu allamut ilungersunartumut attuumassuteqalersillugu patsisigaluguluunniit atorneqassanngilaq.

Oqaluttuarisaanermi takuneqarsinnaavoq pissutsit ilungersunartut atornerlullugit pisortat pissaanerat annertusiartuaarsinnaasartoq, inuiaallu kiffaanngissusertik uterteqqinngitsoorsinnaasarlugu. Tamanna nunatsinni pinissaa qularnarsinnaagaluartoq aamma mianersuutigisariaqarparput. Ajunnginnerpaamilluunniit siunertaqarsimagaluaraanni nunarsuarmi ajunngitsumik siunertaqarluni ajornerpaamik iliuutsit pinngortarsimapput.

Taamaattumik uuma inatsisissap killilimmik ullulernissaa Atassummiit kissaatigivarput, naaffianilu aaqqissugassanngortinnagu atorunnaarsivinnissaanik ullulerneqassasoq. Siunissamilu pisussanut ilungersunartorsiorfiusussanut tulluarsakkamik peqqissaarussamillu suliassamik aallartitsisoqarluni.

Siunnersuut ataatsimiititaliamut innersuupparput.

Tamassi malinnaasusi immissinnut paarilluarnissassinnik kissaappassi. Tamatta akisussaassuserput erligigutsigu immitsinnut inoqatitsinnullu paarilluarta.

Nutaarsiassat innersuussat