Inatsisartut ullutsinnut tulluarsarlik

Nalunaarutigineqarpoq Corona pillugu Inatsisartut immikkut ittumik ataatsimiisinniarlugit aggersarneqartut. Naak nuummiittuinnaat allallu sinniisussat nuummiittut aggersarniarneqarunaraluartut isumaqarpugut aggersaaniarniarmut eqqarsarneq qanganisarpallannerujussuusoq.

Inatsisartut sinniisuilu inersuarmi ataatsimoortikkumallugit oqariartuut imminut illersorsinnaanngilluinnarpoq navianarpallaarujussuarlunilu. Qarasaasiakkut, emailikkut allatigulluunniit Inatsisartut taaseqataatinneqarsinnaalluarput, soorlu massakkut Europa parlamentimi taamatut suleriaaseq ingerlanneqartoq.

Paasisarpullu malillugu Namminersorlutik oqartussanut attuumassutilik tunillatsissimammat ulorianarpallaarpoq inunnik aggersaanertalimmik ataatsimiisitsisoqassappat. Internet qarasaasiarlu atorluarlugit Corona, inatsisitigut aningaasatigullu eqaannerusumik akiorneqarli.

 

Emma Lennert

Atassutip Inuusuttaasa Kattuffiat (AIK)

Atuarfiit meeqqeriviillu matoqqaneranni iluarsartuunneqarlik

Nuuk matuvoq, inuit ataatsimoorsinnaaneri mattussorneqarput.

Atorluarniartiguli tamanna. Sanaartornikkut suliffeqarfiit unittuuinnannginnissaannut aningaasanik tuniinnarneranniik atuarfiit, meeqqeriviillu aaqqissuutsinneqarniarlik.

Sanasut suliffeqarfii aningaasanik annaasassaannik tuniinnarneriniik suliaqartikkaanni akilersinnaanerussaqaaq. Atuarfiit meeqqeriviillu aserfallattaalineqarnerannut piffissaq atorneqarniarli tamanut iluaqutaasussamik.

 

Aqqalu C. Jerimiassen

Atassutip siulittaasua

Eqqarsarluarutta aniguilluarumaarpugut

Atassutip Naalakkersuisut suleqataallu tamaasa nappaassuup Coronavirusip akiorniarneqarnera pillugu suliniuteqarluarmata nersualaarusuppakka. Neriuutigilluinnarparalu innuttaaqataasut tamavitta akisussaaqatigiinnerput inassutigineqartullu  malilluarumaarigut.

Manna tikillugu pisortat namminersortullu ingerlataanni aningaasarsiornerup unittuunnginnissaa siunertaralugu politikkikkut aaqqiisoqarallarnera iluarisimaarnarpoq.

Nappaassuaq sivitsortumik atuutiinnassagaluarpat, tuniluunnerlu nunatta sinneranut sunniulluni, ernumanarluinnarpoq Nunatsinni aningaasarsiornerup unittuuvissinnaanera.

Taamaattumik minnerpaamik aningaasaqarnerput pillugu plan A plan B-qarnissaq avaqqunneqarsinnaanavianngilaq. Naalakkersuisunut inussiarnersumik inatsisartuni partiit tamattaalluta ataatsimiititaliallu susassaqartut suleqatigiilluarnissarput pingaaruteqarluinnartumik inissittooratarnissanut pilersaarusioqatigiinnissaq kaammattuutigerusuppara.

Qallunaat Nunaannit suli naalagaaffeqatigiippugut, sulilu Nunatsinni naalagaaffiup aningaasalersugaanik sulisorpassuaqarpoq. Qallunaat Nunaanni pisortat suliffeqarfiini namminersortullu unittuunnginnissaat qularnaarumallugu aningaasarpassuarnik ikiorsiinissamut partiit tamarluinnarmik isumaqatigiipput.

Naalakkersuisut partiillu tamatta naalagaaffeqaterput Qallunaat Nunaat Nunatsinnut aningaasanik ikiuunnissaa siunertaralugu isumaqatigiinniarnissartik aallartereersimanngikkunikku siunniuttariaqaraat sakkortuumik kaammattuutigerusuppara.

Neriuutigeqaara pissutsit ilorraap tungaanut piaartumik aallarumaartut, soorunamilu nalilersuinerit aamma allanngortinneqarsinnaasarput. Tamavissi ajunnginnerpaamik kissaappassi.

 

 

Siverth K. Heilmann

Atassut

Coronavirusi inuiaqatigiit aningaasaqarneranut annertuumik eqquisinnaavoq – akiligassallu utaqqinavianngillat.

Piffissami aggersumi coronavirusi pillugu sulinermik inuussutissarsiuteqartut namminersortullu aningaasaqarneranut annertuumik eqquinissaa Atassutip Inuusuttaaniit aarlerinartoqartipparput. Ineqarnermullu kiassarnermullu akiligassat utaqqinavianngillat.

Coronavirusip tuniluunneranut atatillugu immikkut ittumik nalaataqarpugut. Virusip tuniluunnera siullertut peqqinnissaqarnermut sunniuteqarpoq, tamatumali saniatigut aamma inuiaqatigiinni aningaasaqarnermut atatillugu annertuumik sunniuteqarpoq, taamaammallu aamma sulinermik inuussutissarsiuteqartut annertuumik aningaasarsiorneranut eqquisinnaavoq.

Coronavirusip tuniluunnera aningaasatigut sulinermik inuussutissarsiuteqartunut namminersortunullu kingunipiloqartitsissaa Atassutip Inuusuttaaniit aarlerinartoqartipparput, piffimmi aggersumi imaassinnaammat sulinermik inuussutissarsiortut aningaasarsiaat appartut, soraarsitaasut, imaluunniit kaaviiaartitaat annikilleriartoq. Akiligassaallu utaqqinavianngillat, nalunngilarpummi qaammatit tamaasa ineqarnermut allanullu akiligassat takkuttuaannartut.

Taamaattumillu sulinermik inuussutissarsiortut namminersortullu kaaviiaartitamik ilaannik tamakkiisumilluunniit annaasaqarsimasut, annaasaqarnissamilluunniit ilimasuttut, pissutsinillu tamakkunannga aningaasaqarnikkut ilungersortitaalersut, qaangiilluarnerunissaannut ikiorumallugit Atassutip Inuusuttaaniit pisortat ikiuunnissaminnut periarfissanik ammaassinissaat kissaatigaarput, soorlu aningaasanik taarsigassiinikkut inuiaqatigiinnut tamanut periarfissiineq.

Coronavirusip tuniluunnera aningaasatigut sulinermik inuussutissarsiuteqartunut namminersortunullu kingunipiloqartitsissappat, pisortat aningaasatigut taarsigassarsianik ikiuunnissaat makkunannga imaqassaaq:

  • Nukissiorfinnut tunngatillugu akiligassat – innaallagissamik, imermik kiassarnermullu akiligassat.
  • Ini a/s – inissianut tunngatillugu akiligassat.
  • Solar-imut – kiassarnermut akiligassat

Inuiaqatigiit aningaasatigut eqqugaasimasut pisortaniit ikiorserneqartariaqartut Atassutip Inuusuttai isumaqarput, inigisamummi akiligassat qaammatit tamaasa takkuttarput, nerisassanullu akissaqartariaqarlutik.

Taamaammat pisortat periarfissiisariaqarput inuiaqatigiit aningaasatigut eqqugaasimasunut ikiuissallutik, taamaasilluni pisortat sulinermik inuussutissarsiuteqartut aningaasaqarnikkut, namminersortullu ingerlaannarsinnaanissaannut ikiuissapput. Atassutillu Inussuttaasa kissaatigaa COVID-19-ip siaruaannerata kinguneri taamarsuaq inuiaqatigiit aningaasaqarneranut innarliinissaa pinaveersaartinneqassasoq.

Allattoq:
Emma Lennert, Atassutip Inuusuttaani siulittaasoq.

Naalagaaffik aningaasatigut ikiortiserisariaqarparput

Suliffeqarfiit soraarsitsiortorlutillu matoorarlutik aallartipput. Nunatta karsiata artorpaa suliffeqarfiit amerlasuut matoorpata ikiorsiissummik tapeeqattaarnissaminut. Naalagaaffeqatigiinnerup iluani aningaasatigut ikiorneqarnissarput pisariaqarpoq.

Aningaasaqarnikkut nunarput isasuussanngippat ikiorsiissummik qinnuteqartariaqarpugut. Suliffissaaleqinerujussuaq pinaveersaartissagutsigu piaartumik iliuuseqapallattariaqarpugut. Pingaartumillu namminersortut nunatta aningaasaqarneranut kivitseqataasussat immikkut iliuuseqarfigisariaqarpagut.

Peqqinnissaqarfittalu malinnaasinnaanissaanut annertuumik ikiorneqartariaqarpugut. Danmarkip ministeriunerata oqariartuutaa malittariaqarparput tamakkiisumillu upalungaarsimasariaqarluta.

Aqqalu C. Jerimiassen

Atassummi Siulittaasoq

Daniel Skifte

Inuk ataqqinartoq politikkikkut sulinermi nunatsinni sunniuteqarluarsimasut ilaat.

Daniel Skifte meeraaninni qummut isigilluinnakkannut ilaavoq, Atassutip ukiuni arlariinni ingerlaneranni siulersorneqarnikkut siuttuulluarsimasutut ersersiutissaqarluartoq takuneqarsinnaavoq.

Atassut 1983-illi kingorna kinguariaateqartarluni ingerlasimasoq kisiartaalluni piffissami nutaanerusumi qinersinermi 1995-imi partii siuariaateqartinnikuua, tassuunakkullu ersarippoq siuttuulluartoq anguniagalik pimoorussilluni sulisimasoq.

Daniel Skifte 1982-imiik aalajaattumik politikkikkut ingerlasimavoq, partiimilu siulittaasuusimasuni ulloq manna tikillugu sivisunerpaamik siulittaasuusimalluni, tassalu ukiuni qulaaluani 1993-imiik 2002 tikillugu.

Nunatsinnut ernerulluartoq, politikkikkut sulilluartoq pillugu ilaqutaasunut qanigisaasunullu misiginneqataanerput Atassummiit anngupparput. Eqqaaneqarnera ataqqinartuuli.

 

Aqqalu C. Jerimiassen

Atassutip siulittaasua

Naak Naalakkersuisut siulittaasuat?

Partiiminut siulittaasutut, kiisalu nunatta Naalakkersuisuisa siulittaasuattut pisuni ilungersunartorpassuarni oqaaseqannginnera naammalerpoq.

Naalakkersuisut siulittaasuat pisussaaffimminut qimarratiginnippoq. Nunatsinni corona virus pillugu ernumaneq annertuvoq, oqaaseqaranilu. Henrik Fleischer Siumukkunniit anisitaasoq uteqqittorlu pillugu oqaaseqanngilaq. Kiisalu allattaanerup soraarsitaaneranut, minnerunngitsumillu kanngunartunik killissanillu qaangiisoqartarneranut oqaaseqannginnera paasiuminaatsilluinnarpara.

Takusarparput pisut ilungersunartut nalaanni nipangersimarujoortarneq, oqallisaajunnaarnissaat puiguinnarneqarnissaallu utaqqillugu. Misigivungali massakkut nipangersimajuarneq akissuteqartannginnerlu Naalakkersuisut siulittaasuata tamatigut atortaraa. Apeqquserujussuarparalu ilumut nunatsinni siuttutut inissisimaannarusunnersoq.

Siuttuuniaraannimi suliat annernarsinnaasut aamma suliassaapput qimaaginnarnani.

 

Aqqalu C. Jerimiassen