Naalakkersuisut unammilleqatigiinneq killilerpaat

Uggornarluinnarpoq Naalakkersuisut nunatsinni aalisarnerup ineriartortinnissaanut paasinnissimanngimmata. Uummannami Sigguk A/S nutaamik fabrikkiliornissaminut Naalakkersuisuniit itigartinneqarsimapput.

Naalakkersuisut tunngavilersuipput Uummannami RG aamma Avannaa Seafood A/S fabrikkeqareermata pingatserlugit fabrikkeqalernissaanut inissaqanngitsoq. Taanna akissut uggornarluinnarpoq, taakku massakkut fabrikkiusut qaleraliinnaanerusunik suliaqartuummata, aalisartullu saarullippassuarnik pisaqartaraluarlutik tunitsivissaaleqissuttarmatigit. Aalisartut saarullinniarusupput ammassanniarusullutillu Uummannap sulluani nunatsinnullu aningaasaqarnikkut kivitseqataalluarsinnaasumik.

Atassummiit isumaqarpugut unammilleqatigiinneq nunap aningaasaqarneranut pitsaanerpaajusoq, peqassuseq piumaneqassuserlu apeqqutaatillugit. Aallarnisaasut tikilluaqqorujussuartussaavagut tamatsinnut iluaqutaasussaammata.

Taamatut aallarnisaaniartunut killilersuiniarneq nunatsinnut innarliivoq piitsuunnguallatsitsillunilu. Kisinneqarsimavormi saarullinniit ukiumut 50mio kr. tikillugit kaaviiaartitsisoqarsinnaasoq, tamanna saavitsiinnassavarput?

Naalakkersuisut nassuiaalluartariaqarput.

 

Nikolaj Rosing

Atassummi politikkikkut siulittaasup tullia

Saniatigooralugu allagartallit qilalugartassinneqarlik

Qilalukkat qaqortani 340-iusuni 70-it, qernertanilu 424-iusuni 100-t pisassat saniatingooralugu pinialuttartunut nuunneqarniarlik

Qilalukkat, tassaapput politikkeritoqqat qineqqusaarutinnaarsui nikisissanagillu piviusumut pisoqalersillugu.

Maanna nunatsinni immitsinnut erleruuttaattorsuulluta pivugut, peqqinnanngitsorsuarmik immitsinnut avissaartuulluta piniariaaseq pitsaasoq puigorluinnarlugu piniarsaraagut, aaqqeqqinneqarniarli tamanna!

Qatsunnaqaaq politikkeriniit asuli oqarluartaarutitut qilalukkat neqitannaarsuartut atorneqarnerat ”piniartukkormiunngooq pillugit”, uanga isummanni kinaluunnit kalaaleq kalaaliminertortartoq tassaavoq aamma neqissaqartariaqartoq, pappialaq malillugu kalaaleq piniarsinnaajunnaarsangaasoq piniarnermik nuannarisalik naqisimaniinnarneqartariaqanngilaq, taxartartuuguni, allaffimmi pisortaaneruguni, aalisartuuguniluunniit tamarmillu piniartarlutik, isumaqarpunga immikkoortariaqanngilluinnartoq.

 

Knud Kleemann

Atassutip aaqqissuussaanikkut siulittaasup tullia

Umimmaat kisinneqartariaqarput

Uumasorsiuut ukiuni arlalinngortuni umimmannik kisitsisimannginnertik tusagassiorfitsigut umimmaliisimanerullu kingunerisaanik sinerissatsinnut qanoq siammartigisimanerat ilisimanagu nalunaaruteqarlutik.

Naalakkersuisut Kangerlussuup nunataani, ukiuunerani inuussutissarsiutigalugu piniartunut, takornariarialerisartunullu piniarfiusinnaasuni arlalinni umimmanniartitsisarput.

Qimussimik, qamuteralaat, sisamanillu assakaasulinnik umimmanniartitsisarneq nalinginnaasorujussuuvoq.

Inatsisartullu oqaluttarfianniit, umimmaat silavaraluttuinnarneri suaarutigisarpara, siusinnerusukkullu neqileriffimmut tunisassiarineqartussanut apuutereersimanissaannut piumasaqaatinut naleqqunnaarnerat ilanngullugu.

Aasaanerani aamma tammajuitsussarsiniartitsisartut takornarissat, nunaqavissut panertuliniartarfiinut  anngunnikuupput, akornutaasumik akueriuminaalluinnartumik inngiaagaluttuinnarlutik.

Takornariaqarneq aningaasarsiutiginissaa pimoorukkutsigu, atuisut nunaqavissut tusarniarneqarnissaat paaseqatigiinnerlu avaqqunneqarsinnaanngilluinnarpoq.

Qanittumi Qeqqata ataatsimiititaliaani Kangerlussuarmi paasisassarsiorpugut, nunaqarfinni aqutsisunik, innuttaasunillu ataatsimiititsineq pissarsiffiulluartumik ingerlallutigu.

Uumasorsiuut umimaat qanoq nikitsigisimanerat paasisaqarfigerusukkunikku, piniartunik peqataasunik, piniarnermillu nakkutilliisunut tusarniaaniarlik. Uumasersiuut umimmaat ukiumut 33 %-imik amerleriartartut oqaatiginikuuvaat.

Kangerlussuup nunataani, ukiuunerinnaani umimmanniartitsisarneq ukiuni marlunniluunniit eqqissisikkallarneqarnissasut aammalu takornarissanut piniartitsiviissatut nunaminertat, nunaqavissunut akornusersuutaasinnaasut amerlavallaannginnissaat nalilersussallugit isumaqarpunga.

Kisitsisoqarniarpat tikilluaqqunarpoq, Kangerlussuulli nunataani umimmaat qanoq illikartigisimanerat paaserusunneqarpat atuisut suleqatigineqarniarlik, aningaasassaaleqinerit suleqatigiilluarnikkut anigorneqarsinnaasarmata.

 

Siverth K. Heilmann

Inatsisartuni Kommunalbestyrelse-milu ilaasortaq

Atassut