Aaja ilumoorluinnarpoq – namminiilivinnissaq oqallisaavallaaqaaq

Ullumikkut nunatsinni aaqqitassat eqqartoqqaarallartigit aaqqiissuteqarfigalugillu. Nuannaarutigilluinnarparpullu Aaja Chemnitz Larsen aamma Inuit Ataqatigiit tapersiimmata piviusorsiornerusumik politikkikkut ingerlatsinerunissamut.

Tamanullu kaammattuutigerusupparput nukippassuit aningaasarpassuillu namminiilivinnissamut atunngikkallarlugit, ullumikkut nunatsinni ajornartorsiutinut nukivut, piffissarput, aningaasallu atussagigut.

Namminiilivinnissaq pillugu takorluukkap kusanartup, assersuutigalugu peqqinnissaqarfiup pitsanngorsarnissaa piviusunngortinnavianngilaa. Siunertap kusanartup meeqqanik atornerluisarneq apparsarunnanngilaa, aamma siunertaq kusanartoq pillugu suliffissat nutaat pinngorarnavianngillat, aalisakkalluunniit amerleriarlutik.

Piviusorsiortumik aqutsineq pingaartinnerusariaqarparput aningaasarpassuillu pisariaqavissortunut ullumikkut atorlutigit. Politikkeriusugut sinnattuaqissutinik sulissuteqarunnaarutta, inuiaqatigiit imminnut nappassinnaanerulernissaat angujartuaassavarput. Namminiilivinneq pappiliaannaanngilaq. Namminiilivinneq qinnuteqaataanngilaq. Namminiilivikkiartuaarneq isumalioqatigiisitarsuunngilaq. Namminiilivinneruna inuit imminnut napatissinnaasut piginnaasaat.

Namminiilivinnissaq pillugu taamak annertutigisumik siunniusimajuartilluta, taamallu annertutigisumik aningaasartuutigiuartillugu, suliassaviit tunulliunneqartuassapput aaqqitassaagaluartullu kingornunneqartuassallutik. Kingunerivaalu isumaginninnikkut aningaasartuutit annertuupilussuit, inuillu imminnut pilersorsinnaassusaat annikitsoq. Tamakkulu akileraarummik qaffasissumik, akitsuuterparujussuarnillu matussuserniartuartut, aalisagartassiinerillu qaffasippallaarujussuartut siunissamut attassinnaanngisagut.

 

Aqqalu C. Jerimiassen

Atassut Siulittaasoq

Nutaarsiassat innersuussat