Qitiusumiit pissaaneq alliartorpoq

Pisortat pissaanerat alliartorpoq, inuillu kiffaanngissusaat milliartorluni. Qitiusumik aqutsineq annertusiartorpoq, anngaasussiaannartullu inuiaat inissinneqarluta.

Imaanniartussaagaluartoq ”sulinermut ilanngaat”, Naalakkersuisut aalajangerput isertitakinnerpaat akunnattumillu isertitalinnut ukiumut ataasiartumik ”tunissutitut” agguaanneqartalissasut. ”Qujanaq suligavit, aajuku oorit, ukiup sinneranut pissatit”.

Atassummiit taperserluinnarparput sulineq akilersinnaanerusariaqartoq. Ilimaginngilluinnarparpulli ukiumut ataasiartumik sulisunut aningaasanik tunissuteqartarnikkut sulerusussuseq annertusarneqassasoq. Tamannalu nioqqutissanik akitsuusersuinikkut akilerneqartussanngorluni. Ukioq naallugu nioqqutissanut atuisut akiliinerusassapput, ukiumullu ataasiartumik utertinneqartassallutik.

Sulerusussuseq qaffassarniaraanni akileraarut appartinneqartariaqarpoq! Tamannalu akissaqartissinnaavarput sukkavallaamik namminiilivinniarsariunnaarutta. Inuit tamatta pisortaniit sernersugaajunnaarutta, akisussaaffiiagaajunnaarlutalu, nammineq inuttut suliassarpassuagut pisortaniit suliarineqarpallaarunnaarpata.

Demokraatit imminnut liberal-iusutut taaniartaraluartut uppernarseqattaarpaat oqaasiinnakkut liberaliunertik. Ilanngaassivik tapersermassuk inuk kiffaanngissusiiarpaat, inuk nammineerluni akisussaaffianik arsaarlugu. Akitsuusersueqattaarnermikkullu imminnut akerlileqqillutik.

Pinngitsaaliissummik utoqqalinersiassanik ileqqaarisussanngoreernikuuvugut, massakkullu pinngitsaaliissummik akiitsunik akiliisussanngortinneqalissaagut. Sunamita tullinnguuppa?

Naalakkersuisooqatigiinnut kaammattuutigerusuppara suleqatiserinninnerusumik suleriuseqaqqullugit, inunnillu tusarnaarneroqqullugit.

 

Aqqalu C. Jerimiassen

Siulittaasoq Atassut

Nutaarsiassat innersuussat