Atassutip naalakkersuisooqatigiinnut teknikkikkut suleqataanini unitsippaa

Naalakkersuisooqatigiit teknikkikkut suleqatigineri annertuumik Atassummut pilliuteqarfiulermat, suleqataanermiit anivugut.

Massakkut suliassatut pingaarnertut inissipparput Atassutip politikkia ersarissassallugu. Taamaaliorsinnaanngilagulli, annertuumik politikkitsinnut pilliuteqarluta anngaasussiaannartut inissinneqartuarutta.

Tassanilu qitiusut ilagivaat Atassutip politikkerinngisaminut arlalipparujussuarnut anngaasussiaannartut inissinniarneqaqattaarmat, Atassummiillu akisunaarinnippallaarnerput naammagilerparput.

Naalakkersuisooqataajunnaareerluta suli pituttuiniarneq malunnarmat, ersarissumik massakkut politikkerput takutikkusupparput. Atassut anngaaginnartussiaaqqissanngilaq. Kiffaanngissuseqarluta politikkerput malillugu ersarissumik isummersortassaagut akuersillutalu itigartitsisarluta.

 

Aqqalu C. Jerimiassen

Siulittaasoq, Atassut

Nutaarsiassat innersuussat