Angajoqqaatut akisussaaffik

Atuarfiit ilinniartitsisullu pisuutittuaannarsinnaanngilagut. Meeqqatta atuarnerat suli pitsanngortinnerussagutsigu, meeqqallu ilinniarnikkut angusaat qaffassarniarutsigit akisussaaffik annerpaaq angajoqqaaniippoq.

Ilinniartitsisunngorniarneq sivitsorneqarli, atuarfeqarfinni aqutsisut ilinniagaat qaffassarli, klassimi atuartut ikilisinneqarlik, ilinniartitsinermi oqaatsit, oqaatsillu ilinniartitsissutigineqartut il.il. sorpassuit meeqqat atuarfiini pitsanngorsaaniarnermi, politikkerit suliakkerneqartuarput, ilinniartitsisullu tikkuartorneqartuarlutik. Ilinniartitaanikkut aaqqissuusseqqinnerit suliarineqartuarput, immaqa suliluunniit suliaq siunertamisut suli misilittagaqarfigineqalinngikkaluartoq.

Pitsaasumik angusaqarusukkaluarnerujussuaq, ilungersornerujussuarlu ilinniartitaanikkut nunatsinni qaffassaarusulluta, politikkerertagut, ilinniartitsisullu pisuutinneqartarnerat aamma illuatungeqarpoq. Meeqqat atuarnerannut siunissaannullu angajoqqaat pingaarnerpaatut akisussaaqataalluinnarmata. Angajoqqaat meeqqaminnut kaammattuilluarnissaat. Meeqqaminnut piumasaqarsinnaanissaat, atuarnerannullu malinnaalluarnissaat isumaga pingaarnerpaarpaavoq.

Uggornarporli akisussaaffik politikkerinuinnaq ilinniartitsisununuinnarlu tikkuartuinerujussuaq atuuttarmat, angajoqqaatullu pisussaaffik akisussaaffillu soorlumi annikilliartortoq. Nassuerutigisariaqalerunarparpummi angajoqqaatut aamma uagut angusagut naammaginanngissimasinnaammata. Soorunalimi aamma puigorneqassanngillat angajoqqaarparujussuit meeqqaminnut aqqutissiuilluartut.

Tamattaasariaqarpugut atuarfeqarnikkut ilinniartitaanikkullu iliuuseqartariaqartut, tikkuartuinnarata akisussaaffimmillu iperaaginnarluta. Uagununa meeqqavut akisussaaffigut. Politikkerit sinaakkutissat isumagissavaat, ilinniartitsisut ilinniartitsineq isumagissavaat. Uagullu angajoqqaat meeqqat toqqissisimasut, malinnaasinnaasullu perorsassallutigit.

 

Aqqalu C. Jerimiassen

Atassut

Nutaarsiassat innersuussat