Ileqquusumik ataatsimeersuarneq

Arfininngorneq ulloq 9. november 2019 Atassut ileqquusumik ataatsimeersuassaaq. Nuummi Katuap inersuaaraani ingerlanneqassalluni 09.00-17.00

2017-ip aallartilaarnerani Atassut Inatsisartuutitaarussimalluni, annertuumillu aningaasatigut amigartooqqasoq, ataatsimeersuarnermi siulittaasunngorpunga. Aallartisaqqinniarnermilu suliaq annertooq imaannaanngitsorlu ingerlassimavarput, naqqaniillu aallartisarnertut taaneqarsinnaalluni. Allaammi 2018-mi Inatsisartunut qineqqusaartussanngorluta atsiortitsiniaaqqaarsimavugut partiitut aallarterlaatut.

Massakkut ukiut pingasunngulersut, aningaasaqarnerput aaqqissimavoq, Inatsisartuni marlunnik ilaasortaatitaqarluta, marlunnik Naalakkersuisuutitaqarsimalluta, Atassullu maleruutiinnartutut isigineqartaraluartoq takutipparput nammineerluta aqunneqaratalu isummersorsinnaasugut.

Naak napparsimarujussuarsimagaluarlunga aallartisaqqinneq qaqeqqinnerpullu uanninngaanniit suliaq naammassilluartutut isigaara, siulittaasutullu tunuartussanngorninni neriuuteqarfigilluarpakka kinguaariit nutaat, nukiillu nutaat atorlugit suli Atassut pitsaasumik angusaqaqqikkumaassasoq.

Ataatsimeersuarnerup kingorna sapaammi Atassutip politikkia ersarissarumallugu suliaqassaagut, kingusinnerusukkut avammut nalunaarutissatsinnik.

Oqareernittuullu siulittaasussatut Aqqalu C. Jerimiassen ataatsimeersuarnermi innersuukkumaarpara, piukkunnarnerpaatut isigigakku suliallu kivilluarsinnaassagaa qularutiginngilluinnarpara. Allanik siulittaasussatut piukkoortunik nalunaartoqanngilaq.

Soqutiginnittut malinnaarusuttullu tamassi ataatsimeersuarnermi tikilluaqquassi.

 

Siverth K. Heilmann

Siulittaasoq, Atassut

Nutaarsiassat innersuussat