Sianiissalikaarneq killeqanngilaq

Trumpimut aamma Pele-mut.

Trump-ip sianiilliorpalaarnerujussua, immaqaluunniit iluanngitsumik eqqarsaateqarnera, Kalaallit Nunaat pisiarerusullugu oqaaseqarnera suli ulluinnarni aalassassimaarutigaarput. USA’p siunertarisimassappagu Naalagaaffeqatigiinnerup ajortisarnissaa, qunnerup annertusiartuaarneranik pilersitseqataaginnarpoq. Assulli apeqquserujussuarpara massakkut USA’p præsidenterisaa ilumut siunissamut ungasinnerusumut eqqarsarsinnaassuseqarnersoq. Immaassinnaavorluunniit taamatut sianiitsiginngitsoq, immaqalu nalusatsinnik suugaluarnersumik pilersaaruteqareersimalluni.

Partii Naleraqqalli USA’p neqeroorutaa soqutiginartortaqartippaat. Tassamigooq Naalagaaffinngornissamut qanillissaagut USA’mut pituttorutta. Namminiilivinnissaq suna tamaat akigalugu, ataatsimoorussassattalu annikinnerpaarpaaffiani.

IA’kkullu isumaqarput USA’p nunarput Danmarkimiit suusupaginerussagaa. Qanoruna Danmarkip nunarput suusupagigaa? Ila nunamut suleqatiginerpaasatsinnut oqaatsit sakkortussusii.

Tamakkiisumillu isigissagaanni maani nunami isummat oqaatsillu atorneqartut ila pitsaanerunngilluinnarput ”tasamanngaanniit”.

Naalagaaffeqatigiinnut ilaavugut, aningaasaqarnikkullu ikorfartorneqarluta. Kiffaanngissuseqarpugut inuillu tamat oqartussaaqataaffigisaanniilluta. Qaavatigullu Kunngeqarfiup inatsisartuini marlunnik sinniisoqartarluta. Ajornartorsiulerfimmilu assersuutigalugu pinngortitami ajunaarnersuartoqartillugu, aammalu isumaginninnikkut ikiorserneqarsinnaasarluta.

Nunatsinni ilinniarsinnaasatta avataatigut akileeqqaarnata ilinniariartorsinnaavugut. Nunani avannarlerni nuttartoqarsinnaavoq, Danmarkip ataani innuttaasutut allaqqanerput pillugu.

Sianilluanngitsortaali tassaavoq isumaqatiginninniarnissaaq ilaatigut Partii Naleqqamiit kissaatigineqarmat USA’llu nunaminertaasa ilaattut inissittoqarsinnaalluni. Inuillu tamat oqartussaaqataanerat nunatsinni pilliutigalugu, akeqanngitsumik ilinniarsinnaanerput periarfissat unitsiinnarlugit, atugarissaarnerlu pilliutigisinnaallutigu.

Taamatullu eqqarsaatersortoqarneq nunasiaataasimanerup kingunerisinnaavaa, amerlasuujullutalu allaat misigisimanngisaannagarput eqqaamasaqarfiginngisarpullu. Ilisimavarpullu atornerluinikkut ajornartorsiutivut ajornerujussuunikuusut. Naak ullumikkut suli ajornartorsiutigut taakku annertugaluartut annikillingaatsiarnikuupput. Uagut inuit assersuutigalugu imigassamik atornerluilluta ajornartorsiuteqaraangatta pisimasut misigisarsimasavut peqqutaakkajuttarput. Ingerlariaqqissaguttali isumakkeerinnittariaqarpugut.

Inuiattullu aamma. Ukiorparujussuit qaangiummata pisimasut unittoorfigiinnartariaqanngilagut. Massakkullu kingumut qiviarnikkut angajoqqaatta oqaluttuarisartagaat pillugit nuanniitsumik isiginninniartarneq ataatsimuussutigisariaqannginnatsigit. Inuiattullu akuersaarinnillutalu isumakkeerinnittariaqalerpugut, siunissaq pitsaasoq ornissagutsigu ingerlariaqqillutalu.

US Virgin Islands aamma Puerto Rico USA’p nunaataasa ilaattut inissisimapput, stat-iunatilli. Nunarsuarmilu nuna ”demokratiskiusumiit” anginerpaamiit taakkununnga neqeroorutigineqartartumut naamerluinnaq allamut paarlaakkusunngilara. Illuatungaanili massakkut periarfissagut inuiaqatigiinnut pigitiinnarusuppakka ineriartorteqqillugillu.

Naalagaaffeqatigiinnerup iluani ataatsimoorta, susassaqarfigullu nukittorsaqqillugit. Amerlanertigummi aatsaat annaasaqareernerup kingorna periarfissarisimasagut paasilertarpagut.

 

Nikolaj Rosing

Atassut

Nutaarsiassat innersuussat