Kukkussut inuit inuunerannik naleqartarpoq

Namminersornerullutik oqartussat siusippallaamik peqqissutsimut naalakkersuisoqarneq nunatsinnut eqquppaat.

Oqartussaaffiup nunatsinni atuutilernerata kingorna ukiut 27-it qaangiutillartullu killiffik imaannaangitsumik inuiaqatigiinnut artukkiisoq saqqummeraluttualerpoq.

Peqqinnissaqarfiup inuiaqatigiinnut kiffartuussinera naammanngilaq, piffissanngorsorinarporlu peqqinnissaqarfiup Naalagaaffimmut uterteqqinneqartariaqalernera. Nassuerutigisariaqarparpummi aningaasaqarnikkut sulisussaqarnikkullu immitsinnut artukkerujussuarsimasugut, innuttaasullu pilliutigiinnaqqalerlutigit.

Isumaqarpunga piffissaq qanillivallaartinnagu peqqinnissaqarfiup inuit pisinnaatitaaffiinik aamma pisussaatitaaffiinik ataqqinnittumik kiffartuussilertariaqartoq, inuiaqatigiit toqqissisimasumik inuuneqartikkumallugit. Peqqinnissaqarfiulli allaffissorneruneq toqqarnagu inuit tikillugit qiviarlugit avammut saaffiginnittariaqalerpoq, ajornartorsiutilli qiterisaa ersarissumik saqqummiuttariaqalerpaa.

Peqqinnissaqarfik naalagaaffimmut uterteqqinneqartariaqarpoq, peqqinnissaqarfik Naalagaaffeqatitsinnik aqunneqarnera ajornannginneerarsuussasoq isumaqarama. Inuit peqqissusaat inatsisitigut illersorneqarsinnaasumik inissisimanissaat aamma eqqortumik kiffartuuneqarnissaat ilisarnaatigigatsigu.

Oqartussaaffimmik qimarratiginninngilagut, oqartussaaffiilli qiterisaa ajornartorsiutaanera oqimaatsorujussuusoq. Taamaattumik pisariaqartissimavarput ersarissumik oqaatigalugu peqqinnissaqarfik naalagaaffiup utertillugu tigusariaqaraa.

Peqqinnissaqarfiup Naalagaaffimmut uterteqqinneratigut EU-mi inuit pisinnaatitaaffii malillugit periusissiaqalerneq pitsaanerusumillu kiffartuunneqalerneq atuutilersinneqassaaq. Nunani tamalaani EU-mi ilaasortaasunut periarfisseerusuppugut nakorsat nunatsinnut suliartorlutik atorfinittarnissaat, taamaaliornikkut kiffartuussineq eqqornerusoq napparsimasumullu toqqissisimanarnerusoq atuutilersinneqassammat.

Inuup peqqissusaa salliuttuartariaqarparput namminiilivinniapiloornermullu pilliutiginngisaannarlugu. Utertitsinissarlu kanngusuutigineqarpallaassappat minnerpaamik ilinniutigisariaqarparput oqartussaaffinnik tigusiniapiloornersuaq inuit atugaannik, peqqissusaannik, allaallu inuunerannik naleqartarmat. Siunissamilu akisussaassuseqarnerusumik aalajangiinissaq pingaartinnerullugu.

 

Bentiaraq Ottosen

Atassut

28 29 94

Nutaarsiassat innersuussat