8. marts 2010

Gerhardt

Arnat ulluanni pilluaqqussut
Kalaallit Arnat inissisimalluarnersi inuiaqatigiinni nukittoqqutigilluarparput – qujanaq!
Asasagut arnat kalaallit.
Nunarsuarmi arnat pisinnaatitaaffimminnik sorsuutiginniffianni ATASSUT-mit qamannga pisumik pilluaqquassi ullorsiorluarnissassinnillu kissaallusi, ullumimi ulloq ilissi pigaarsi taamaammat oqariartuutisi naalaarluassavagut.
Inuiaqatigiit kalaallit ukiut ikittuinnaat ingerlanerini ineriartupiloorneranni nukittuumik inissikkiartuaarnitsinni ilissi arnartavut annertuumik qujassutissaqarfigaassi, ilissimi pissutaalluinnarlusi meerartagut inuusuttortagullu tunngavissinneqarluarput ilinniarluarsimallutik inuiaqatigiinni suliassanik kivitseqataasinnaanngorsarlutik.
ATASSUT aallartimmalli ilaqutariit qitiusumik inissisimanerat pingaartilluinnarlugu sulivugut sutigullu tamatigut ilaqutariit ingerlalluarnissaannut inatsisistigut sinaakkusersuilluartoqarnissaa suliassatta pingaarnersaanut ilaajuarpoq, taamaammat nuannaarutigisatsinnik naartunermut erninermullu atatillugu angajoqqaat sapinngisamik sivisunerpaamik merlertortaminnik eqqissillutik najuisinnaanerisa qujakkeersimajuarneqarnissaa ATASSUT-mit pingaartilluinnarparput.

Ilaqutariilli suli pitsaanerusumik inuuneqarnissaannut miserratigisassaanngitsumik annertuumik suliassaqarpugut:

– Arnat angerlarsimaffinni tujormisitaasartut allaallumi persuttagaasartut ikigisassaanngillat, angutinut nukersorniartartunut sakkortuumik kaammattuutigissavarput ajornartorsiornermi persuttaaneq atornagu oqaloqatigiinneq paaseqatigiinniarnerlu aqqutigisaqqullugit.

– Ilaqutariit ajornartorsiortut isumaginninnikkullu navianartorsiortut pisortanit ilaannakortumik sullinneqartarnerat qaangerneqartariaqarpoq ilaqutariimmi ajornartorsiortut avissaartuutsillugit immikkut ikiorniarneqartarnerat pitsaanngilaq, ataatsimoortumik sullinneqarunik ataatsimoorlutik ajornartorsiutiminnit aniguiniarnissaminnut sakkussanik nukissanillu tunineqartarput, taamaammat pisortanut kaammattuutigissavarput ilaqutariit sullinneqarnerini ataatsimoortumik sullissineq tamatigut isumannaarniartaqqullugu.
– Arnat inuuussutissarsiornermi naligiissitaallutik ingerlanissaat tamakkiisumik anguneqarnikuunngilaq, suli ajoraluartumik arnat, pingaartumik arnat qitorniornerup nalaanniittut tunulliutitaasarput, sulisitsisunullu kaammattuutigissavarput sulisussarsiornerminni arnat mattunniartaqqunagit.

– Inatsiseqaraluarpugut suliffeqarfinni ingerlatseqatigiiffinnilu pisortat pigisaanni siulersuisuni arnat angutillu naligiissitaassasut, taamaattorli tamanna qaangiataaginnarlugu siulersuisunik ivertitsisarnerit suli nalinginnaavallaarput, taamaammat Naalakkersuisunut kaammattuutigissavarput arnat siulersuisuni peqataanerulernissaat siunertaralugu sulissuteqaqqullugit.

Oqaasissat suli arlaliissuugaluarput, taamaattorli ATASSUT-mit ullumikkut ulloq arnartatsinnut naalaarnermut atussavarput, naggataatigullu ullorsiorluarnissassinnik kissaateqqissavassi.

Gerhardt Petersen
Siulittaasoq

ATASSUTIP KATTUFFIA – ATASSUT LANDSORGANISATION – THE ATASSUT ORGANIZATION