Revolution Slider Error: Slider with alias atassut not found.

Avatangiisinut akitsuutit qaffasinnerusut kikkunnut iluaqutissiisussat ?!

ATASSUT-mit assut tupigusuutigisatsinnik Kalaallit Nunatsinni nuna tamakkerlugu radiokkut nutaarsiassaqarfituarput aqqutigalugu, GrønlandsBanken-imi atuisunut ataasiakkaanut sullissinermi pisortaq, Peter Petersen, akeqanngitsumik minutsini arlalissuarni suliffeqarfimminnut iluaqutaasussamik ussassaarinissaminut periarfissinneqarpoq.

ATASSUT-mit paaserusunnartipparput misissuinerit suut takutissimaneraat nunatsinni inoqutigiit avatangiisinik annikitsuinnarmik mianerinnittuuneragaanerannik oqartoqarsinnaalersillugu? Inoqutigiit benziinamik uuliamillu piisaaramik? Taamaattoqarsimappat qanoq annertutigisumik?

Allatut oqaatigineqarsinnaanngilaq, uppernarsaatissaqanngitsunik GrønlandsBankenip pisortaa oqalutsinneqarpoq, malunnarpormi taassuma malussarniuteqarfiginngikkaa Kalaallit Nunatsinni innuttaasut inoqutiillu ulluinnarni inuuniarnerminni qanoq artorsareertigisut allaallu ulluinnarni inuuniarnerinnarmut nukippassuit atortariaqaraat, taamaattoqaraluartoq nammariigaasa qaavisigut benziinamut uuliamullu qaavatigut nammatassinniarneqarnerat ATASSUT-mit naaggaarluinnarparput.

Taamatuttaaq assut isumakulunnartoqartipparput Inuit Ataqatigiit sinnerlugit Inatsisartuni ilaasortap Naaja Nathanielsen-ip imaaliallaannarluni GrønlandsBanken-ip anguniagaanut tapersersuisinnaammat. ATASSUT-mit Naaja Nathanielsen, Inuit Ataqatigiit aammalu Naalakkersuisooqatigiit sakkortuumik kaammattussavagut GrønlandsBanken-ip imminut iluaqutissinniarluni anguniagaa nakkaannarfigeqqunagu.

Igalaanik taarsersuinissamik allaanerusumillu oqorsarnissamik siunertaqartumik Innuttaasut pinngitsaalillugit GrønlandsBanken-imut taarsigasssarsiniartinneqassanngillat! Eqqaamaneqartariaqarpormi, inoqutigiit amerlanerpaat nunatsinni pisortat attartortittagaanni najugaqarput, pisortallu tassaapput ussiittoqarsimappat nutaamillu oqorsaasoqartariaqarsimappat suliassamik ingerlatsisussat.

Inussiarnersumik inuulluaqqusillunga

Gerhardt Petersen
Siulittaasoq